泳兒將於十月十六日三十七歲生日，在九展舉行她入行十三年以來，第八個演唱會。有別於過往的作風，這次籌備期間，她在各方面都加入了很多自己的意見。
「由揀歌、編曲同跳乜嘢類型嘅舞、着乜嘢跳舞衫，甚至乎promotion嘅idea，我都表達咗好多我想做嘅嘢——呢方面同以前真係好唔同！因為我由細到大都比較內斂，心裏面可能有好多嘢諗，但唔敢表達，驚諗嘅嘢廢廢哋、驚錯，又驚人哋唔鍾意，好多顧慮。但呢家我發覺，唔應該閂咗個閘俾自己，令到自己有遺憾。」
的而且確，她多年來給予外界的印象，都只是斯斯文文、很好相與的乖乖女。「應該話，外界以前會覺得我好似冇乜性格。都係嘅，以前我可能真係好似一個公仔，叫我做乜，按個掣我就去做，就算件事我自己唔鍾意嘅，我都只會同最close嘅朋友，或者男朋友講；講完，我都會盡力做咗佢，唔想麻煩到人，又唔想人哋覺得我麻煩。」
過去數年，是泳兒的人生谷底：母親中風需長期住院，自己又突然失聲，兼且皮膚敏感導致爛面。今天終於走出陰霾，最大得着是學會表達自己。
「經過呢幾年，我會諗，點解以前我成日要令自己咁唔開心呢？呢家我會講自己嘅要求同意見出嚟，我舒服咗好多，咁樣做出嚟嘅嘢或者音樂，都會比較有靈魂。
「我覺得人生總會有低潮嘅時候，最緊要係一定要相信自己可以跨到過去，咁你就會跨到過去！」共勉之。

 

太突然

泳兒的人生低潮，始於一五年底。「嗰陣我媽咪突然間中風，好危險。佢本來好精靈，中風時只係得五十幾歲，未到六十，以腦中風嘅人嚟講，佢算係好年輕。佢喺醫院隔籬牀位嗰啲，全部都係大年紀嘅病人。」
母親自此需要長期住院。「佢o依家叫做渡過咗危險期，雖然算係半個植物人，但佢有意識，亦都擘到眼。當然，我都希望會有奇蹟出現！」
屋漏兼逢夜雨，翌年，她舉行十周年個唱期間，自己身體也開始不適。「當時我只係覺得唱歌辛苦咗好多，我以為只係身體差咗，或者係年紀大咗。慢慢呢，我嘅氣管成日有嚿嘢頂住，又長期有啲黃色綠色嘅痰出嚟，突然間開唔到聲，連公司同事都問我要唔要休息一下。」
失聲原因未明，殊不知連皮膚也出事。「我本身冇皮膚敏感，係忽然塊臉爛晒，又出晒風癩，我完全諗唔到辦法，唔知點handle。」

.將於十月十六日舉行的《重新感應》演唱會，泳兒坦言，屆時會有一part比較性感。「我唔想為咗暴露或者上位，特登着到好sexy，最緊要係配合到啲歌同我個人。」

今年五月初，泳兒（後排右一）榮升為大姑奶，細佬（後排中）結婚當日，亦有安排中風的母親（前排左）到場。「我覺得媽咪係開心嘅，只係表達唔到啫。」

跟髮型師男友Ziv拍拖八年，感情穩固。「我成日都俾人問幾時結婚，或者我哋會突然結咗o架！」