為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2019 年 10 月 05 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

健康、快樂、富足的復星模式

「以客為先」係好多企業嘅既定策略,但針對乜嘢「客」同點樣將客戶放在優「先」考慮,至係策略成功關鍵。最近見到復星國際(0656)管理層,傾起呢個課題,公司有深入見解。首先,復星策略定位係「以家庭客戶為中心」,而家庭客最重視乜嘢?公司認為係家庭在不同階段對健康、快樂和富足方面嘅需求,因此沿呢三大生態發展多條產品線。公司稱呢個理念為「1+N」,即係一個總部或定位衍生出N條產品線。
有廣告大師講過,你可以令一個消費者購買佢唔需要嘅產品,但冇辦法令佢買唔想要嘅嘢,呢個係need同want嘅分別。復星覺得兩者都重要,客戶認為有需要而且消費得開心,至可以成就「爆款」產品線甚至發展成產業。不過爆款唔會持久,所以公司打造產品嘅過程從不間斷,同時配合未來趨勢,利用智能科技,不停創造龍頭產品和品牌。復星目標轉型為一個科技帶動嘅家庭消費產業集團,冀未來每條產品線都可以帶來優質盈利貢獻,成為增長嘅爆發力。

復星策略定位「以家庭客戶為中心」,發展理念為「1+N」,即一個總部而衍生出N條產品線。

 


其中主打健康生態嘅復星醫藥(2196),所持復宏漢霖(2696)上月底剛上市。復宏漢霖研製嘅明星產品漢利康,今年獲國家藥品監督管理局批准上市,成為中國第一個獲批上市嘅自主研發生物類似藥。藥物主要用於治療非霍奇金淋巴瘤,已列入國家基本藥物目錄,定價每十毫升約一千六百元(人民幣,下同),較原研藥低三成,可以話係患者用得上兼用得起嘅藥。公司現時共擁有兩個對應全球銷售前三名藥品嘅生物類似藥產品。
富足生活除咗累積財富,仲需要喺面對突發事件,例如出現健康問題時得到保障。復星於是在健康產業基礎上發展醫療保險,從而產生協同效應。復星聯合健康保險,經營理念係建立醫療加保障整合模式,推動治療、養老、醫藥、康復機構合作,成為全面健康管理服務體系。打通旗下醫藥醫療健康與保險業務,可以為客戶提供多重保障,亦成為公司另一爆發力強嘅產業。一九年上半年全國保險業務收入為上年同期六倍,反映消費者受落。
至於快樂生態業務就由復星旅文(1992)領軍,針對中國家庭消費升級而發展,旗下產品線包括Club Med、三亞亞特蘭蒂斯等知名品牌,目前係全球最大度假村經營者,呢項業務亦最為市場熟悉。另外,一八年公司完成重組豫園股份,上海係復星起源地,而豫園一直係當地文化地標,經過創新改造和升級,變得脫胎換骨更具時代感。至於一六年收購英超狼隊,之後帶領隊伍由英冠晉升英超,係另一成功案例。目前正進行嘅包括為LANVIN重塑品牌以挖掘內在價值,預計會係另一爆款明星產品。今年上半年復星旅文扭虧為盈,顯示公司有併購重組然後turnaround嘅能力。
上半年復星國際應佔純利七十六億元創新高,經營利潤亦按年增五成二至六十一億元。中期海外收入佔四成三,來自歐洲、中東、非洲和美洲等,可見公司逐步發展為全球化企業,進一步分散風險。