為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2019 年 09 月 28 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

再談海外置業

分散投資係風險管理第一步,但對於一般香港投資者,如果組合裡面有房地產,以現時香港樓價並非人人可以為組合再添一個單位。有國際物業顧問今年四月發表報告,香港樓價屬全球最高,私樓平均樓價折合約九百六十三萬元(港元,下同),每呎逾一萬六千元,雖然近月樓價回調但仍屬高企,要分散投資都係要擴闊範圍。
投資海外房地產並非新鮮事,熱門城市樓價亦已上升唔少,但投資者如果勤力啲,仍然可以發掘到值得投資嘅地點。我個人認為,雖然海外不乏回報率和升值潛力合理嘅投資機會,但力不到不為財,要揾到筍盤唔可以齋睇數據,最好都係去實地考察,親身見證物業地段、交通配套、社區設施等條件。畢竟單位能否輕易出租出售,或者自住退休,以上都係關鍵。香港人工作忙但又鍾意外遊,可以同我一樣寓睇樓於旅遊。
最近我馬不停蹄去唔同地方睇樓,剛去過馬來西亞檳城,今個周末會去澳洲,遲下到蘇州同長沙。先講馬來西亞,我曾在二○一七年到當地睇樓並喺本欄提及,在當地買樓不單止在於投資,仲可以作為移民退休考慮,因為港人可以透過「第二家園計劃(MM2H)」移居馬來西亞。香港生活空間細,好多人退休後都想住得闊落啲,過得悠閒啲,但考慮到適應問題,多數人會揀亞洲三大熱門地區——台灣、新加坡及馬來西亞。其中台灣以創業、技術和升學為移民者提供路徑,新加坡則透過全球商業者計劃授出永久居住准證,兩地並冇特定為退休人士設移居捷徑。大馬嘅第二家園計劃就相對簡單,申請人毋需更改國籍即可於當地長期居住。

馬來西亞買樓不單止在於投資, 仲可以作為移民退休考慮,因為港人可以透過「第二家園計劃(MM2H)」移居馬來西亞。

 


美國《國際生活》雜誌今年一月發表「全球退休指數」,馬來西亞係全球排第五嘅最佳退休地。馬來西亞生活指數低,對香港人嚟講語言相通,容易展開新生活,其中檳城更加以美食聞名,係馬國八個城市中嘅慢活之選。從投資角度嚟睇,大馬近年積極發展北部州屬經濟,檳城亦有幾項大型計劃在籌備階段,「慢」中都有一定增長動力。
根據大馬國家產業資訊中心資料,該國房地產價格大約由(折合港幣)七十八萬元至二百二十七萬元,平均樓價係香港四分一,難怪吸引港人到當地買樓。檳城樓價近年屢見上升,雖然一八年升勢放緩至接近持平,但今年首季樓價又重拾升軌,升近百分之三點一,今年年初檳城樓價中位數為約二百一十七萬元。
當然,如果仍未退休,想喺馬來西亞做啲小生意,首都吉隆坡係另一選擇,因為第二家園計劃唔可以工作但容許創業。雖然吉隆坡樓價較檳城貴,但勝在具備做生意嘅條件同人才,未來亦可以捕捉「一帶一路」及「新馬高鐵」商機。
大馬之外,我亦鍾情澳洲,並已在悉尼置業。今個周末我會去布里斯班同黃金海岸,實地考察樓盤示範單位同投資機會,返港後再同大家分享。