五十歲的「阿譚」譚耀文，千禧年開始進攻內地市場，是最早一批北上發展的藝人；十三年過去，一三年，他正式回流，減少了長期中、港兩邊走的生活。

「喺外面拍嘢，好多時我收咗工就會返酒店，自己一個人喺間房度，係好private嘅時間，我可以好舒服咁沖完涼、食少少嘢，就同自己傾偈，問吓自己今日做咗啲乜，邊度做得唔夠好——同自己傾偈呢樣嘢，我覺得係做演員必需嘅。

「喺香港拍戲呢？好處係車程又快又方便，唔使嘥成個鐘先返到屋企，就算睇醫生、做gym都好方便。不過最大嘅唔好處，就係有好多現實生活嘅嘢，會令我分神。」

他所謂的「現實生活」，就是與家人共渡的天倫時間，皆因他回流，正正就是為了愛妻和他的一子一女。

「可以返屋企，係喺香港拍戲最大嘅好處。不過十二個鐘開完工，得番八個鐘休息，第二朝起身，又要做番嗰個人（角色），所以就算返到屋企，要保持住嗰個角色，就要㩒住自己，唔可以喺屋企，或者面對社會、世界發生緊嘅嘢，表現得太過開心，即係好似細個時，阿媽講得最多嘅『玩創晒個心』。尤其是，有時（拍戲）開頭未搵到方法令自己投入角色，係會有啲辛苦嘅。」

 

 

譚家明

阿譚是個很用心的演員，對於每個要演繹的角色，他都會很認真地對待。例如將上畫的《不義之戰》中，那個率領一眾霸王花，搗破澳門恐怖活動的警察指揮官角色「譚家明」，便是他親自改名的。
「最初接呢套戲，導演只係話我知，個角色姓譚，可能只係叫『譚Sir』，冇講乜嘢名。但係我覺得點都要有個名o架，跟住就諗到叫『譚家明』。因為我覺得譚家明導演好出名，呢個名又好好聽、好有氣質，好啱呢個角色。」
電影裏的「譚家明」，為人嚴肅又盡忠職守，卻因為失去了妻子而變得有情緒病。阿譚拍此片，既要應付多場動作戲，又要處理不少內心場面，身心皆疲。
「如果講動作戲，班女仔開工前比我付出多好多，有幾個要訓練三個月。我呢？就訓練咗三十年，應該唔使再訓練，哈哈哈！不過太難嘅動作，就算我話冇問題，武術導演都未必會俾我哋演員做——咁好彩呢樣嘢，我自己都冇太大興趣，哈哈哈！
「至於話內心戲呢？我諗鍾意做戲嘅演員，都會鍾意揀呢種角色做，因為如果好淡嘅，好似對唔住觀眾，對唔住自己，好似未盡全力咁！所以講攰，一定係mentally攰過打。」

在戲中，阿譚既要應付多場動作和開槍場面，亦有不少內心戲。「拍打戲，都有佢嘅文化，可以話係一種藝術同學問。」

角色要率領霸王花，搗破恐怖活動，阿譚十分佩服一眾女演員。「佢哋拍之前，都要訓練三個月，好多動作都會親自落場。」

阿譚說起一對子女，馬上變得十分冧滋滋。「佢哋的確俾咗好多歡樂我！有時見到我，都會????吓我、冧吓我，係好開心o架！」