偉業初成 陳偉成
大家記得陳偉成（Avis）是誰嗎？
如果說是「周秀娜」舊愛，或可以挑起你的印象。與娜姐一樣擁有四吋事業線的「大隻仔」Avis，今年已三十七歲，感情生活多姿多采的他，終於收心養性，向廿四歲的model女友黃樂樂求婚成功。
即將為人夫，Avis自然更專注為事業打拼。五年前與友人合辦健身中心，近年生意愈做愈好，今年踏入五周年，第三間分店亦即將開幕。
Avis坦言，以往做藝人令他有不少不快經歷，近年專注健身中心生意，才發覺自己最喜歡做老闆。「因為緋聞，我同屋企人都被追蹤採訪，影響到我哋嘅生活，所以好唔開心。都係做生意最實際，唔使理太多是非人事，可能比較適合我。」
事業、家庭都略有小成，不需活在別人的陰影下，距離建立真正的「偉業」，又邁進了一步。
靠生肖揀老婆
翻查Avis的資料，他曾經是model、拍過電影，也有經營髮型屋及健身中心等，但主要的報道，是圍繞他跟周秀娜及一些女藝人的緋聞，難免令人覺得他是位花花公子。
他坦言，早年看到這些新聞亦感到很介意，不過事過境遷，現在已經找到真命天女，並計劃於明年年尾拉埋天窗。談到未婚妻，Avis臉上隨即泛起甜絲絲的笑容。
「大家都知，我拍過好幾次拖。我覺得拍拖，性格、相處好重要，搵到啱嘅人其實好困難。所以我要多謝楊天命，係佢教識我生肖原來好重要，我以前唔信o架！我屬雞，而之前兩個女友，就分別屬狗同兔，同我嘅生肖相沖；而o依家嘅女友就屬豬嘅，原來同我出奇地夾，都唔到我唔信邪。哈哈！」
雖然Avis跟未婚妻黃樂樂拍拖不足一年，但二人早已認定了對方，他表示，相處舒服最重要，且要懂得互相遷就。「未求婚前，我將事業放喺第一，總希望女友唔好阻礙自己工作。婚後就當然係家庭第一啦！責任大咗，以後如果生咗小朋友，就要更加搵多啲錢。我覺得組織家庭，令我多咗一份責任同鬥志，去專心做好我嘅事業。」
說到舊愛周秀娜，他則一本正經地說：「已經係過去式嘞！幾年無聯絡，不過我相信，佢心裏面會祝福我，我亦會祝福佢，呢啲在心中就OK。」
至於對近日周秀娜與余德丞的緋聞，Avis就話：「哈哈！真假都好，呢啲八卦新聞睇完就算，我唔會放上心。」
Avis表示與周秀娜的一段情已是過去式，他亦再無與對方聯絡，希望大家專注他的新發展。
兩口子先影婚紗相，Avis希望明年年尾可給予太太一個童話式婚禮。
他謂與曾任空姐、現職model及KOL的女友，相處舒服，很快已認定對方為終身伴侶，二人更不時拍拖到日本旅行。
