為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2019 年 08 月 28 日

張紋嘉 重新定位

關於張紋嘉(Crystal),很多人大概只會聯想到女子組合HotCha,實情HotCha早於一四年已拆夥,Crystal自己亦早已轉型當演員,參演劇集和電影之餘,更主攻舞台劇。九月中,她與兩位拍檔自資的首個劇場《進擊の廢能量》,便將於藝術中心麥高利小劇場公演。

「雖然呢個劇只係小型製作,但咁樣反而創作空間更大、冇乜負擔,只係喺演出方面,我就好大壓力!」

皆因她在這齣劇中,既要搞笑,又要演繹多個角色。「呢個劇主要以『廢青』、『廢中』同『廢老』為主題,講一啲好地道嘅小故事,話俾大家知,其實所謂嘅『廢青』、『廢中』同『廢老』,根本一啲都唔廢!

 

 

「喺劇裏面,我同兩個拍檔,要做十幾個小人物角色——我兩個拍檔之前做開喜劇,又成日扮鬼扮馬,所以好快就駕馭到;但係我呢?之前啲人都只係搵我做啲愛情小品同啲正經嘅劇,都係啲好斯文嘅乖乖女角色,o依家要我搞笑,真係跳出咗我嘅框框o架!」

與其說這是Crystal的突破演出,不如說她終於清晰了自己的可能性。畢竟她自單飛後,曾迷惘過,尋尋覓覓、兜兜轉轉了好一段日子,才找到自己最想要的。

「做舞台劇就算收入冇咁高,但我起碼搵到自己享受嘅一件事。我做每個舞台劇都學到好多嘢,嗰啲嘢都唔係用錢可以去衡量。」

所以,各位此後敬請謹記:Crystal是演戲的、Crystal是演戲的、Crystal是演戲的——重要的事要講三次。

 

 

無憂

張紋嘉(Crystal)○七年與Regen(張惠雅)和Winkie(黎美言)組成女子跳舞組合HotCha出道。「我初初嘅心態,只係純粹玩吓,唱吓歌、跳吓舞,幾好玩呀!因為我諗:呢隊組合都唔會hito架啦,呢個世界啲嘢,邊有咁容易呀?」
結果組合大熱,工作多到冇停手。「日日都要好早起身化妝整頭,跟住又唱又跳又要演出做訪問,一日九個event排到滿晒,返到屋企完全冇時間、空間諗嘢,就話要瞓覺……以前覺得咁樣好辛苦o架,但同樣地亦可以話好無憂。」
她說,無論如何,HotCha對她來說,都是很甜蜜的回憶。「我哋去過好多地方:馬來西亞、美國、日本,拍過MV,出過好多歌,又做過好多演出。我最深刻印象,係○八年HotCha第一次喺九展StarHall開演唱會,因為我真係冇諗過,可以喺個台度,對住咁多人唱歌,然後啲人都識你嘅歌,玩得好開心、好enjoy……嗰晚啲情景,我仍然歷歷在目。」
當然,三個女仔也不是沒有爭執過的。「點會冇呀?試過住酒店,邊個沖涼先,我哋都嗌過交,哈哈哈!o依家諗番起,呢啲嘢真係好好笑,no big deal。」

去年,HotCha合體舉行十周年演唱會。「我哋三個大個咗好多,處理好多嘢都淡定咗。雖然拆咗夥之後,大家少見咗,但係我哋啲默契依然喺度。」

 

一四年單飛後,Crystal曾因一年只推出一首歌,感到十分迷惘。「係唔開心o架,都唔知自己做緊乜。」