為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2019 年 08 月 21 日

祥情請看…阮兆祥

阮兆祥將於十月底在麥花臣開騷,騷名很長,長過阮兆祥。「叫做《何濟公唔使五分鐘就決定全力支持阮兆祥King of Dreams演唱會》,哈哈哈哈!」他以King Sir鍾景輝的聲線和口吻介紹後,便仰天大笑起來。
對,是演唱會,不是棟篤笑,也不是扮嘢騷。
畢竟他的搞笑形象太深入民心,確實沒有幾多人會記得,他是參加歌唱比賽入行的——唱歌本來就是他的情意結,做歌手本來就是他的夢想。
「開個唱,係上年我同製作團隊傾開,佢哋提醒咗我,原來八九年,我出咗我第一張唱片,今年啱啱係三十周年。既然係咁,係咪應該要回歸初心,做番個歌手呢?好老實講,大家不嬲見開我,都係好搞笑,要我開演唱會,我自己最初都有少少顧慮,係比較冒險嘅。但係,既然自己有夢想,就算好似我呢啲咁嘅老年人,都應該要去追,咁我咪博一博,做啦!」
正因如此,祥仔除了是這個唱的歌手,更參與了整個籌備過程的每一部份。「我今次好想大家集中喺音樂度,所以我同音樂總監成功爭取到隊band有十六個樂手。我揀咗好多由七十年代到o依家嘅一啲歌曲,希望可以俾到唔同年紀嘅觀眾一啲回憶,咁我就心滿意足嘞!」
最最最最最要自己謹記的,是不能哭。
「我過往喺自己嘅騷度,都會忍唔住喊,但今次呢個演唱會,我係唔會俾自己有一滴眼淚流出嚟!」他很堅定地說。

 

 

 

 

學界陳百強

阮兆祥要唱歌這個初心,始於小學。「我整個成長過程,都係喺音樂環境裏面。我爸爸生前係個粵曲愛好者,鍾意新馬師曾先生,鍾意到不得了;我媽媽就鍾意聽國語歌;我姐姐就鍾意聽英文歌。」至於他,則是個書蟲。「有日我阿媽可能覺得我冇乜興趣,發展得唔係好平衡,就開始帶領我唱歌,慢慢我就發覺唱歌令我好開心!」
此後,他便開始加入學校的合唱團,升上中學後,他更是不少校內和校外的歌唱比賽常客。「都未輸過!哈哈哈!」他得戚地說。
中三那年,他以一曲陳百強的〈念親恩〉,代表母校高主教書院,到銅鑼灣聖保祿學校,參加參聯校歌唱比賽。「我唱開頭兩個字『長夜……』咋,啲女仔就已經嗌晒!哈哈哈!」結果,他成為了高主教首位聯校歌唱比賽冠軍,獲得「學界陳百強」的美譽。「係『學界陳百強』,唔係『學界陳百祥』呀!哈哈哈!」
而同一年代的校際歌唱界風頭躉,還有來自華仁的「學界譚詠麟」李克勤,以及就讀聖士提反堂的「學界柏原芳惠」周慧敏。
哼,睇吓點?

八十年代尾,祥仔以「DJ歌手」身份,推出他的首張大碟《我心深處》。「上年我同製作團隊傾開騷,係佢哋提醒番我,原來呢隻碟已經係三十年前嘅事。」