鍾楚紅優雅地踢拖

爭一歲就「登六」嘅鍾楚紅（紅姑），保養得宜，令人羨慕，更有「凍齡女神」嘅稱號。雖然以佢嘅條件尋覓第二春肯定冇難度，但自老公朱家鼎於〇七年因大腸癌病逝之後，深情嘅佢曾經講過，對老公仲有戀愛感覺，唔想再婚，甘願守寡十二年。好彩，紅姑身邊有不少閨密，譬如佢同鄭秀文、甘比（陳凱韻）都好friend，所以就算單身都唔寂寞。

早前，東姑就喺中環嘅ifc遇到紅姑，戴上黑超，僅搽咗唇膏淡妝嘅佢，依然明艷照人。佢先喺服務台向職員問嘢，然後就行到大堂，不停篤電話、講電話，又四圍張望，似乎喺度搵緊人。佢等咗一陣，有位着黑衫嘅女性朋友終於出現同佢會合，然後兩女一邊行一邊傾，行出商場外嘅上落客區等車。

由於當日係落雨天，東姑現場所見，紅姐踢住一對拖鞋，又着上一件花碌碌嘅乾濕褸，上車時仲將乾濕褸頂帽笠上頭遮雨，跟住急急腳快步咁行，睇落有啲狼狽，但仍不失佢優雅嘅一面。

一個人現身中環ifc嘅紅姑，好親切友善咁向商場服務台嘅職員問嘢。

之後，紅姑走出大堂當眼嘅位置，不停篤電話、講電話，似乎正在搵緊人。

講住電話喺電梯口徘徊嘅紅姑，相信等緊朋友，轉頭一個女性朋友出現，同佢會合。

當日天氣唔穩定，不時落大雨，而紅姑相信為輕便，就選擇着拖鞋。

為免雨水淋濕頭，紅姑笠埋乾濕褸頂帽，快步走上車；雖然過程睇落有啲狼狽，但不失優雅。