朱茵蛻變師奶

現年四十七歲嘅朱茵（Athena），曾經係唔少男生心中嘅「性感女神」；不過，一二年下嫁咗黃貫中（Paul）成為人妻，又係六歲囡囡黃鶯嘅媽咪，難免歲月不饒人！

早前，佢同麥長青（麥包），齊齊亮相內地節目《熟悉的味道》做嘉賓，兩人喺廿七年前，因合作主持無綫兒童節目《閃電傳真機》而結緣，今趟難得聚頭，難免一起話吓當年。朱茵喺節目度，多謝麥包作為前輩，當年好幫新人，時時指點佢；而麥包就開玩笑，笑朱茵多年後皮膚依然係咁黑，又爆響口話朱茵當年同緋聞男友周星馳（星爺）拍《逃學威龍》時，其中有一幕，朱茵用手掩住半邊面偷望星爺，原來因為佢當時眼睛生咗粒大瘡。

早前，東姑喺九龍城巧遇「女神」，果然同麥包講嘅一樣，朱茵的確擁有一身好健康嘅皮膚。而當時戴上墨鏡嘅佢，穿着一件白T恤，襯一條四個骨褲，再孭個環保袋，啲師奶味甚為強烈。睇嚟一代「性感女神」嘅佢，今日嘅狀態已明顯不復當年勇喇！

戴上墨鏡，身穿T恤、四骨褲嘅朱茵，衣着隨便得嚟有啲土味，搞到外形成個師奶look。

孭住個環保袋，似出街買餸嘅朱茵，邊行邊忙住摷袋，睇落都幾狼狽。

節目中，麥包爆朱茵喺《逃學威龍》裏面，一幕掩眼偷望星爺嘅場面，原來係因為眼生瘡。

呢幕朱茵喺《逃學威龍》嘅經典場面，迷倒唔少男士，但原來只係美麗嘅誤會，而非刻意。

同Paul拍拖十五年、結婚七年嘅朱茵，育有六歲大囡囡黃鶯，至今夫妻恩愛如昔，一家三口不時幸福出巡。