鄭丹瑞寒背遊老銅

表面上生得高有着數，咁身高有一米八十一厘米嘅鄭丹瑞，應該大把着數啦！事實又唔係喎！佢同老婆喺學生時期已經認識，拍拖時，鄭太生得細細粒，因為身高差距，朋友間一直都唔係咁睇好；而為咗遷就女友，鄭丹瑞仲不時彎腰照顧，細心體貼，終於抱得美人歸！

結婚近四十年，鄭生、鄭太恩愛到暈！鄭丹瑞都曾經講過，有邊個男人唔鍾意後生女；不過，佢自認孤寒，唔想花錢媾女，同時覺得免費餐只係男人嘅幻想，所以佢奉勸天下「巴打」，千萬唔好以為世上會有免費餐，因為付出嘅唔單只係錢，更加係自己嘅一生，所以佢自己一定唔會試。

早前，東姑喺銅鑼灣見到鄭丹瑞喺前面行過，高高大大嘅佢，加埋條吊腳褲，當然矚目；之但係，東姑仲發現到佢竟然有寒背，有理由相信，係因為遷就得老婆多，為愛情付出嘅代價。

一米八十一厘米高嘅鄭丹瑞，平時喺鏡頭前做司儀，冇寒背嘅迹象，但係自己行街就寒晒背。

鄭丹瑞生得咁高，加埋戴口罩、黑超，仲要閃閃縮縮，都好難唔認得佢囉。

曾經因高度問題，鄭丹瑞同太太盧維思唔被睇好；不過，佢哋最終喺八一年結婚，婚後仲生咗兩個女，恩愛如昔。