為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2019 年 08 月 15 日

被圍攻要求表態 大學校長四面楚歌

反修例示威演變成多場血腥衝突,隨着多名大專生被捕,咒罵、清算之聲,由街頭蔓延至校園。多間大專院校校長均被示威學生當成箭靶。

因學生捲入「鐳射筆」風波嘅浸大校長錢大康被狙擊得最慘,雖然第一時間探望被捕學生,但就因為唔肯發聲明譴責亦唔肯投訴警方,被轟「無心救人」,屋企馬上遭報仇式圍攻。本刊發現,有自稱係「光復浸大義士團」嘅人,近日喺網上向佢發出恐嚇信,聲言「你不想學校的辦公室,和你的宿舍,就像立法會大樓和狗窩的收場,便要識趣。」雖然浸大發言人回應話校長無收過呢封信,但網民硬要校長「歸邊」嘅姿態甚囂塵上;可惜高教界校長們無人夠膽聲援。

大學校園崇尚自由,能包容異見,不過現時風頭火勢,激進聲音逐漸蓋過一切。校長尚且自身難保,有大學教師更爆料話,不時遇到怒氣沖沖嘅學生拍門要求簽名加入抗爭,「感覺好似被脅持一樣,簽又死,唔簽又死!」焗住簽名可能係下策,但有老師慨歎自從嶺大校長鄭國漢「被脅持」上街參加非法集會都就範後,其他院校嘅校長同教師變相被擺上枱,都要表態。

明知參加非法集會都唔敢Say No,睇怕都係肉隨砧板上。不過科大校長史維企硬,只現身對話,死都唔出席遊行;教大校長張仁良都拒絕「踩鋼線」,只去信特首林鄭月娥要求撤回修例。

出身國際知名學者嘅八大校長面對激進學生來勢洶洶狙擊,都變得進退維谷。除港大校長張翔夠膽發聲明譴責暴力,稱「破壞性的行動應予譴責」外, 部分校長為免刺激學生,發嘅聲明都顯得模棱兩可。中大校長段崇智雖然挺身同學生對話三粒鐘,但因無正面回答會否支持成立獨立調查委員會,以及譴責警方濫權,學生一度憤怒離場。會後校長亦被「教訓」,座駕被當成連儂牆,貼滿便利貼!

有大學教職員話,校長們進退失據全因擔心「順得哥情失嫂意」,「校友、教師同教職員都分成幾派人,有『黃』亦有『藍』,校長呢頭討好班學生,轉頭就得罪晒其他人,點收科!」

八大校長陷苦戰,曾試過被人跟蹤嘅港專校長陳卓禧話:「最緊要立場鮮明,唔好怕,唔好避!」恒大校長何順文就話:「唔可以一味怪責學生,要幫佢哋諗建設性嘅解決方法!」火頭有排未熄,睇怕校長們都係要各自爬山,各自努力!

錢大康(右)喺對話期間回應香港時局,稱「想不到solution(解決辦法)」,但認為「對話好過打架」。

 

段崇智花三粒幾鐘同學生對話,但同學唔領情,反過來鬧佢係「錄音機」。

 

抗爭學生不滿錢大康拒絕譴責警方,發動同學圍佢屋企。