為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2019 年 08 月 11 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

感人一Q

日本片《導盲犬小Q》曾於亞洲地區大熱,連荷李活都要改編,仲由李察基爾(Richard Gere)擔演,o依家終於有香港版!由導演羅永昌執導嘅《小Q》,集任達華、梁詠琪等實力派,仲有羅仲謙同「文青女神」袁澧林(Angela)等新世代演員,演繹一個感動人心嘅故事。

今次「Paco巨星飯堂」,我就請嚟羅導、阿謙同Angela,去到位於尖沙咀嘅「Yakiniku More」,品嘗特色韓風燒烤,暢談電影背後嘅動人故事。

喺導演羅永昌(中)精心打造下,Angela同阿謙喺即將上映嘅電影《小Q》中,都有令人感動嘅演出。

 

用心準備

電影中,阿謙飾演導盲犬訓練員,所以喺開拍之前,佢特別接受咗為期兩個月嘅導盲犬訓練員計劃,「每星期三日、每次三至四個鐘,我想深入啲了解佢哋嘅工作,之後仲要同一班喺戲中出現嘅狗仔混熟。

「個course一開始都係跟訓練員學習用指令指揮狗狗,之後就係自己一個人訓練,我甚至帶過狗狗入超市,所以一開始就知道,要用好多時間去拍攝,而自己做到嘅工作,就係幫導演減輕壓力。」

阿謙仲話:「現職嘅訓練員仲要不斷受訓,我學嗰兩個月,絕對係填鴨式特訓。有部分狗係從香港導盲犬協會借嚟,因為將來佢哋都要服務視障人士,所以規則會多啲。拍嘅時候有啲危險動作,好似走入車底或者飛撲,都唔可以俾佢哋做,費事影響呢啲真導盲犬日後嘅工作表現啦!」

我帶三位嘉賓,去到位於尖沙咀嘅「Yakiniku More」,品嘗特色韓風燒烤,暢談感動人心嘅《小Q》,背後嘅動人故事。

 

華哥飾演嘅失明人士,同「小Q」有最多對手戲,不難令人見識佢更高層次嘅演技。

 

海底奇兵($168),即海膽帶子牛油果杯,鮮甜醒胃。

 

蘋果木煙燻松露片和牛他他($170),經煙燻嘅松露片帶淡淡蘋果香,配上牛他他提升味覺享受。

 

美國特選龍蝦尾($168),啖啖肉。

 

愛狗如命

同動物做戲,係超高難度嘅工作,阿謙到o依家仍然記憶猶新。「就係因為佢哋難控制,有時會做一啲出人意表嘅事。我記得有場戲,講我帶同小Q去醫院探華哥(任達華),原本想佢坐低再望出去窗出面,表達佢唔想走。但小Q一走入病房,便鑽入我對腳中間,就算我係咁叫佢,佢都係趴喺度唔走,仲做得多過劇本安排嘅。」

拍攝期間,佢仲要蒙住雙眼,喺屋邨遊走。「最尷尬係當我帶狗入超級市場,其他人嘅眼光,就會變得好奇異。可能係佢哋認得我係邊個,或者知道我喺度拍戲,但係第一下都帶有啲抗拒。電影嘅重點,就係希望大眾更加了解導盲犬同視障人士生活嘅難處。」

阿謙曾經養過三隻狗,現時佢同太太楊怡就養緊兩隻貴婦,「我所有狗都係領養嘅,從來都冇買過狗,我最記得第一隻狗係自來犬,佢係一隻好普通嘅唐狗,喺佢意識到自己差唔多要走(離世),佢自己就走得無影無蹤,我冇再見過佢。」

為咗將導盲犬訓練員一角演繹得更傳神,阿謙專程接受為期兩個月嘅訓練,誠意可嘉。

 

戲中訓練導盲犬嘅情節,同現實生活嘅方式大致相同,阿謙嘅演出亦甚有說服力。

 

Angela喺戲中係「小Q」嘅主人,所以佢同華哥、Gigi有對手戲;而楊采妮同郭晉安就以客串身份,飾演佢嘅父母。

 

A4和牛牛肩配蘋果條($195/90g),蘋果條令牛肩嘅肉味更見突出。

 

台灣鱔魚($110),鮮甜嫩滑。

 

「喵人」心聲

至於戲中「小Q」嘅真主人Angela就表示,自己係「喵星人」,養咗兩隻貓,「佢哋都係街貓,係我領養嘅。我支持領養不棄養,聽義工講,我嗰兩隻貓以前都俾人嚇過,所以唔敢接觸人。我啲朋友嚟我屋企,都見唔到佢哋,連我媽咪,佢哋都驚。於是我啲朋友講笑話,呢兩隻貓有啲『弱智』,不過我唔喺香港嘅時候,我家姐又照顧到佢哋o架喎,佢哋係神奇嘅街貓。」

選擇「喵星」,Angela話同家人有關。「因為我妹妹細個嘅時候,曾經俾狗仔咬傷,所以一直驚狗。不過自從拍了呢部戲後,我先真正體會到狗狗可愛嘅地方。

「我都有同阿謙去導盲犬協會接受訓練,開始明白點解拉布拉多犬可以做導盲犬,佢哋真係好乖、好純,不過好為食。有一場戲,狗狗要叫我起身,工作人員於是喺我條頸搽咗少少芝士醬,狗狗就識得舔我條頸,真係好搞笑。」

因為演出呢部電影,令「喵星人」Angela對狗狗有新嘅觀感,佢仲大讚狗狗較為主動,同自己有更多互動。

 

電影拍攝期間,「小Q」有八個替身狗狗,當中有五、六隻會NG好多次,不過為咗演出效果,導演話呢啲NG都係必須嘅。

 

 

 

A4和牛西冷大牛排($390/150g),脂肪同肉嘅分布平均,有入口即化嘅感覺。

 

全天然豚肉五花腩($110),經燒烤後香脆可口,毫無膩感。

 

牛魔終極拼盤($620),有牛舌、牛肋條等配料,啱晒「牛魔王」。

 

Yakiniku More
地址:尖沙咀棉登徑8號地下5-6號舖
電話:27508800