為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2019 年 08 月 08 日

連環鎅Banner、扑爆議辦 黑衣人狙擊建制掀白色恐怖

反條例衝突掀起嘅毆鬥、激罵蔓延全港,部分激進示威者繼衝擊國徽、國旗,下一目標將發洩到建制派議員身上。身在外地嘅行會成員兼立法會議員張國鈞首當其衝,成為被狙擊目標。其位於西環山市街嘅區議員辦事處周日(四號)晚被大肆破壞,玻璃、招牌、影印機等全毀,損失高達十萬元。張國鈞透過長途電話同本刊講:「出事前幾日已有黑衣神秘人暗暗前來踩線,打爛玻璃一刻更用雨傘擋住鏡頭,又兇拍照嘅途人即時刪去相片,唔排除係有心人借反修例為名,提早打擊選舉!」

身在澳洲嘅張國鈞周日晚得悉辦事處被襲後好愕然,稱一向無得罪人亦沒有欠債,「好明顯事件係衝住建制派議員而來!」

出事前幾日,其實已有示威者喺群組登出幾位議員嘅辦事處地址,包括中西區區議會主席葉永成、區議員陳學鋒、楊開永等。張國鈞話,日前有街坊影到有神秘黑衣人經常喺辦事處附近同對面大樓天台徘徊,已心知不妙,第一時間將重要文件搬走,估不到仍難逃一劫。

雖然無貴重嘢,但全部玻璃被扑爆,室內枱椅亦被打個稀巴爛,損毀嚴重,初步點算損失有成十幾萬元。據知張所買嘅保險唔包呢類破壞,隨時要自掏腰包復修。不過張國鈞已明言唔打算整住,會打開門口將爛舖當成「展品」展示,「等市民睇吓你哋眼中嘅和平示威者做咗乜嘢!試問大家仲係咪選擇縱容呢班人?」

建制派人人自危,同喺被狙擊名單上嘅陳學鋒都話,旗下辦事處多咗黑衣人來踩線,擔心同事安全受威脅,「噚晚遊行後今早返來,發現附近一帶嘅橫額俾人連環鎅爛晒,泛民議員嘅就絲毫無損,明顯係衝住區選而來,想建制議員停止服務!」佢語帶激動話:「用破壞手段威嚇,我點都唔會就範!」

開辦七年嘅議辦遭黑衣人嚴重破壞,身在外地嘅張國鈞大歎無奈:「預咗有人想來搞事,但估唔到佢哋連目擊案發經過嘅街坊都恐嚇,兇佢哋刪除相片。」

 

影印機亦被大肆破壞。

 

有街坊拍得近日不時有神秘人徘徊踩線。

 

中西區內多個建制派議員嘅橫額被連環破壞,陳學鋒話:「不會就範!」