為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2019 年 08 月 10 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

雅居樂視業主為「伙伴」

內地房企年銷售額達到一千億元(人民幣,下同),被視為踏上重要梯隊門檻,亦代表企業喺投資布局、融資能力、內部管控等方面達到一定水平,至可以做到呢個規模。二○一八年,內地調控和限貸之下千億房企數量仍達到三十間,十三間係首次晉身千億俱樂部,其中雅居樂(3383)亦在同年預售金額首次突破一千億,錄得一千零二十六億元銷售。

雅居樂一直因應各區市場狀況擴充土地儲備。公司由廣東出發,截至一八年底已經喺六十五個城市地區,共持有預計總建築面積三千六百多萬平方米嘅土儲,其中位於大灣區嘅土地尤其充裕,相信足夠配合日後規劃。公司之前嘅三年規劃希望一九年實現千億目標,亦已提早一年做到。

公司發展以增長、盈利等財務表現量度,但支持企業成長最重要係品牌,可以話「雅居樂」呢個名係公司最貴重嘅資產。兩年前雅居樂集團成立二十五週年時重建品牌,加入「伙伴」兩個字作為核心思想,原因係每一個人成長都離唔開伙伴嘅支持,所以公司視同事、投資者、合作單位,甚至業主和家人為伙伴。

伙伴兩字部首都係「人」,因此雅居樂品牌可以解釋為「以人為本」,亦代表同理心,由客戶角度出發,將心比心,尊重每個人嘅需要和期望,細心留意及滿足佢哋嘅需求。公司希望除咗為客人建造一個家之外,同時通過企業另外七大產業提供多元服務,提高生活質素,套用公司講法令住戶樂活一生。

雅居樂以地產為中心,發展出多元業務並行。旗下八大產業除咗有一八年分拆上市嘅物業服務旗艦雅生活(3319),仲有環保、教育、建設、房管、資本投資和商業管理業務,都同地產業務息息相關,可帶來協同效應。

喺龐大而競爭激烈嘅內地房地產市場,營運決策要快但項目設計就要慢工出細貨。房企要顧及開發效率,一定程度標準化不能避免,但雅居樂喺標準化基礎上進行優化,例如加入地域文化、城市印象等考慮,再結合客戶需求,創造不同設計風格。例如蘇州項目新樂府就加入蘇式園林迴廊,再融入當代城市雕塑設計,項目一八年獲得意大利A國際設計大獎中嘅室內與展示空間設計金獎,可見公司喺設計方面畀足時間落足心機,受到國際認可。

雅居樂一八年首次進入千億陣營,今年上半年共實現預售金額五百八十二億元,按年增兩成半,全年銷售目標完成過半;銷售均價每平方米逾一萬四千元,亦升百分之九點四。不過內地樓市管控仍然嚴謹,上星期召開嘅中央政治局會議上,習近平亦表明「不將房地產作為短期刺激經濟的手段」,下半年房企仍然要謹慎經營。雅居樂持有土儲嘅樓面平均地價每平方米二千八百元,成本甚有競爭力,對於應對市場挑戰立於有利位置。

雅居樂以地產為中心,旗下八大產業除了物業服務雅生活外,還有環保、教育、建設、房管等業務,可帶來協同效應。