為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2019 年 08 月 04 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

驚慄傳說

驚慄電影,永遠都對觀眾有一定吸引力,如若以都市傳說為題材,就更容易令捧場客產生共鳴。即將上映嘅《綁靈》,除集上述兩個元素,仲集港、台兩地新生代演員合演,青春無敵!

今次「Paco巨星飯堂」,我請嚟電影嘅監製、「鬼王」潘紹聰(Edmond),率領陳家樂、曹佑寧同岑日珈,去到位於尖沙咀嘅「鐵板超」,品嘗有質素嘅鐵板料理,暢談拍攝嘅點滴。

由「鬼王」Edmond身兼監製及演員,加上岑日珈、台灣男神小曹同香港代表家樂(左至右),令驚慄電影《綁靈》除咗具備驚嚇元素,亦甚有青春味道。

 

紅姐搶Fo

電影嘅製作,就梗係要交俾監製Edmond講解:「《綁靈》係一本小說,亦係一個香港嘅都市傳說,以『地綁靈』為中心,即係死亡後唔肯離開一個地方,係一啲好執着嘅怨魂,傳說香港淪陷嘅時期,就有好多呢種鬼魂。

「用都市傳說做題材,係想觀眾一睇就有共鳴同代入感。至於我做埋演員,就純粹係咁啱需要一個人去做呢個角色,最大突破就係呢個角色有好多頭髮囉!」

哈哈哈!幽默嘅Edmond仲話:「其實除咗一班年輕嘅演員,紅姐嘅演出仲有主角feel。雖然佢只係客串咗幾日戲,但咁先更顯出佢嘅深厚功力。」

家樂即時贊同:「雖然我同紅姐得一場對手戲,但係已經feel到晒佢演今次嘅角色,同上一次(《幸運是我》)嘅演法好唔同,就算我只係得個睇字,都偷到少少師。」

來自台灣嘅小曹,今次同紅姐有較多對手戲,「紅姐的氣場很厲害,跟這樣的前輩做對手戲,最初我是很緊張的,因為我用國語講對白,她用廣東話講,我會很在意自己會不會忘詞。紅姐就教我,連對手的對白也記一下,那即興的反應會更自然,比死記對白更能跟角色合二為一,這方法很有用。」

我帶四位嘉賓,去到位於尖沙咀嘅「鐵板超」,品嘗有質素嘅鐵板料理,暢談拍攝電影嘅點滴。

 

紅姐惠英紅以客串形式演出,同舊拍檔家樂有一場對手戲,但影后已對後輩讚口不絕,令人更加期待。

 

 

 

日本芽蔥海膽左口魚盒($188),以左口魚包裹芽蔥及海膽,口感層次豐富。

 

鐵板煎XO醬蟶子皇($98/1隻),來貨分別來自蘇格蘭、冰島等地,非常鮮甜。

 

法國鵝肝配黑松露陳年黑酢($228),配上黑醡、多士及菠蘿,抵消鵝肝膩感。

 

男神合璧

題材有「鬼王」,演技除咗有影后紅姐,仲有家樂同小曹兩位港、台男神,佢哋可謂新生代演員嘅代表人物,家樂話:「我同小曹合作之前,已經睇咗佢主演嘅電影《KANO》,鍾意到睇咗幾次。所以一知道會同佢合作,我就好興奮。」

小曹就表示:「開拍之前,其實我的壓力滿大的,但家樂跟其他香港的演員,都很照顧我,大家年齡相仿,很快我就很放心了。」

除咗同小曹有大量對手戲,飾演同學嘅家樂同日珈,都要喺戲中交手。「我同日珈喺好多年前已經識得,我哋跟同一個老師學演技,但係嗰時我哋比較年輕,未必好明老師嘅教導。今次係事隔咁多年之後,我再見番日珈,仲要做對手戲,我哋都覺得好神奇。」

家樂同小曹係代表港、台兩地嘅男神,電影有佢哋兩個坐鎮,應該吸引到唔少粉絲入場。

 

電影遠赴泰國取景,喺開拍前重特別請法師祈福,小曹自然寧可信其有。

 

電影導演陳鵬振擅長拍驚慄戲種,今次除搵嚟小曹,台灣代表仲有飾演女老師嘅小薰(黃瀞怡)。

 

海鹽昆布焗南非鮑魚伴海膽汁($198/1隻),經海鹽昆布焗製嘅鮑魚,配上以鮮海膽製作嘅醬汁,提升鮮味。

 

清酒配柚子皮煮藍貝刀貝($288),清甜鮮味。

 

狙擊菠蘿

為咗作品再度來港嘅小曹,一講到香港美食,就顯得更加雀躍。「燒鵝!凍檸檬茶!菠蘿包!這些都是我吃過還想要再吃的!特別是菠蘿包,真的非常好吃!就算明知道多吃會胖,還是想吃過後再做運動去『消滅』脂肪!」

家樂就話:「我好鍾意食牛肉,餐餐食都唔係問題,得閒嘅話我都會買一塊貴啲嘅牛扒,煎嚟食獎勵吓自己。」

相比兩位男工,日珈嘅胃口可謂「十分大」。「我好鍾意食澱粉質,尤其係飯,喺拍呢部戲嗰陣,食得特別多。(家樂:「佢食成兩三碗飯,導演都話佢大食!」)唔好嘈!o依家因為要Keep住個身形,有時冇得食飯o架!」

日珈表示,喺拍攝最後一場重頭戲時,導演同監製Edmond都嚴禁佢進入擺放「女鬼屍體」嘅房間,Edmond話:「因為道具造得太逼真,唔好嚇親佢啦!」

 

家樂同日珈昔日曾為演技班同學,今次首度合作,都異口同聲表示對方成熟咗好多。

 

全橡果黑毛豬鞍架($288),經鐵板燒後仍然juicy。

 

鐵板煎巨型琵琶蝦($988起)、鐵板巨型賴尿蝦($300起),屬來自南美嘅代表,肉質爽口。

 

玉子炒豆腐沖繩苦瓜($128),為須預訂菜式,烹調過程相當考工夫。

 

鐵板超
地址:尖沙咀麼地道61號冠華中心地下1號舖
電話:27875135