為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2019 年 08 月 03 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

智能考股專家

以前用大利市機嘅年代,離開公司就睇唔到股票資料,所以我養成記憶股份代號、股價、成交、派息除淨等基本資訊嘅習慣。當然唔係每一隻股都記得,但投資者關注嘅大部分股份我都recall到。不過去到今日有二千幾隻港股,雖然我成日留意住股市,投資者問我個股都答到,但如想按照一啲要求,如板塊、息率、市盈率、過去升幅等先作篩選然後再揀,我只能在自己記憶庫中搜尋再撳機查資料,難免有漏網之魚。

隨住個人理財搬到手機進行,睇市、買賣股份愈趨方便,銀行亦紛紛制定網上和App理財策略及步伐。大新銀行(2356)喺二○一二年開發「證券 Easy Trade」流動交易平台,當時係香港第一間銀行推出本機應用程式(Native App)交易平台,提供市場資訊和落柯打服務。最近銀行執行董事陳維堅(Cliff)同我介紹,公司拍住擅長整合市場數據嘅天匯財經(Megahub),將交易平台升級。新推出嘅「流動證券交易App+」除咗可以買賣,仲為客戶提供技術選股數據方案,作為投資理財嘅輔助工具。銀行證券客戶可以免費使用其中嘅「Power Screener策略選股」,亦可以升級啟動「Power Tracker追蹤策略」功能。

我特別有興趣試用選股功能,因為坊間有不同App,部分能做到按基本分析篩選,又有部分可以提供技術分析。呢個App能同時提供基本及技術分析選項;基本分析包括行業、股價範圍、市盈率等共十五項;而技術分析參數就有相對強弱指數RSI、保力加通道BB、移動平均線SMA等共六項。免費策略選股用戶可最多揀五項篩選參數,得出嘅結果已頗有參考價值,無論投資新手或有一定經驗嘅投資者都適合。如果升級至追蹤策略更加多三項技術分析,而且用戶可以揀晒所有基本分析及最多五項技術分析,選項更多,可更精準地篩選股份。

講出嚟好似好複雜咁,我試用過之後覺得都好簡單,只需要三個步驟:選擇分析工具、確認策略同埋篩選結果,就可以根據個人考慮因素及喜好喺二千幾隻股票入面篩選出心水股,揀完睇埋資料覺得值得投資,亦可以直接掃入相關頁面買賣,或者將選項儲起並改名,日後想按同一個策略選股唔使重新揀一次。當然篩選結果唔係投資建議,但稱之為「智能考股專家」都當之無愧。

現今投資者喜愛自主理財,大新積極拓展數碼化財富管理平台,加上新推出選股和追蹤功能,確實能夠順應客戶需要和喜好。今年首六個月內投資服務客戶人數升百分之五,零售客戶喺銀行嘅投資相關資產總值更增加一成五。睇返公司一八年業績,淨服務費及佣金收入十一點六億元,按年增一成,亦主要來自財富管理業務增長。有人擔心智能化趨勢會取代傳統工序,但事實上,如善用科技提升傳統業務,更能捕捉市場趨勢,提升競爭力。

大新銀行拍住擅長整合市場數據嘅天匯財經,推出「流動證券交易App+」,除可以買賣,仲為客戶提供技術選股數據方案。