舞台真．芝卓見
愈嚟愈多星級演員，跨媒體參演舞台劇，令呢門藝術更容易為大眾所接受，漸漸投身劇迷行列。
即將於八月公演嘅舞台劇《情敵勸退師》，就吸引到演技愈見精進嘅蔡卓妍（阿Sa），同一向以口才著稱嘅卓韻芝（阿芝），分別飾演情敵，班底同題材都予人耳目一新嘅感覺。
今次「Paco巨星飯堂」，我就誠邀兩位女主角，連同導演陳淑儀，及同劇拍檔凌文龍、胡麗英（Grace）同張銘耀（German），去到位於灣仔嘅「大都淮揚」，品嘗特色淮揚菜，細說勸退情敵背後嘅故事。
由Grace、阿芝、German、淑儀老師、阿Sa同小龍（左至右）同心炮製嘅舞台劇《情敵》，甚具看頭。
神級導演操控
舞台劇能夠吸引兩顆星參演，阿芝表示全因淑儀老師。「我聽咗大綱同埋知道係淑儀老師做導演嘅時候，我就叫阿Sa唔好諗，一定要做！淑儀老師係神級份子不突止，今次佢仲為我哋成Team人開班教演技，直情係賣大包，咁筍我哋冇可能唔做啦！
「而喺上堂嗰兩個禮拜入面，我都提升咗我自己，學識咗用埋個身體，即係用肢體動作去配合演出，好似用唔同力度耷低頭，表達出嚟嘅嘢都好唔同。」
淑儀老師就表示：「我哋有時間去為呢個劇準備，所以我一開始就俾成隊演員兩個禮拜時間去上堂，我亦可以趁呢兩個禮拜，去了解佢哋冇乜人知道嘅一面，再將呢啲元素融入劇情，咁觀眾睇到就會有驚喜。」
阿Sa就話：「我直情覺得同淑儀老師係相逢恨晚啦！加埋劇本嘅題材好易令人有共鳴，最正係我同阿芝係飾演情敵，你要諗吓一個點樣嘅男人，同時得我同阿芝兩個鍾意？我哋傾劇本嗰陣，已經達成共識，如果要搵一個人去演，得古天樂符合我哋嘅要求。哈哈！」
我帶六位嘉賓，去到位於灣仔嘅「大都淮揚」，品嘗特色淮揚菜，細說今次演出舞台劇嘅準備工夫。
舞台劇改編自同名嘅網上小說，講述阿Sa發現男友劈腿，於是求助於German、Grace同小龍飾演嘅情敵勸退師，「驅趕」情敵阿芝。
鮑有麥麥（$228），藜麥配上鮮鮑魚，既有鮮味亦十分健康。
拿破崙紅梅片皮鴨（$688/一隻），以紅梅片及拿破崙薄餅配片皮鴨，層次豐富且毫無膩感。
粥水羊肚菌年糕龍蝦（$2,320），選用兩斤半重嘅龍蝦製作，每盞內均有羊肚菌、年糕，粥水鮮甜。
真正融入戲中
雖然劇中「被爭」嘅男主角唔會現身，但阿Sa話重點係為演出準備嘅過程。「演員嘅學習係無止境嘅，我好享受上課嘅過程，淨係淑儀老師嘅教導，就完全擴闊咗我嘅思維方式，每一堂都令我認識多咗自己，發現更加多自己嘅不可能，無論係心理同生理。我喺好耐好耐之前都上過演技堂，但係嗰時仲好年輕，唔係好get到老師講嘅重點，喺演戲嘅時候，通常都係好符碌咁用到啲技巧。
「o依家個人成熟咗，但係未上堂之前，我都會覺得演戲係好孤獨嘅，我一個人去做某一個角色，係自己嘅單打獨鬥。上咗嗰兩個禮拜堂之後，我feel到自己開咗竅，演戲嘅時候係有成Team人同我一齊，同時我真正體會到溝通嘅重要。」
阿芝同阿Sa坦言，跟淑儀老師上為期兩周嘅演技課，獲益良多。前者學會以肢體提升演技，後者就改變以往孤獨嘅演戲模式。
被阿芝同阿Sa認為好筍、由淑儀老師教授嘅演技班，最後者表示喺兩周內，發掘到前兩者未為人知嘅一面，相信觀眾睇到會有驚喜。
阿芝同阿Sa於劇中有大量對手戲，為避免劇透，二人透露重頭一幕已被命名為「武林聖火令」，甚具火藥味。
白湯石頭魚（$1,520），以重兩斤嘅石頭魚炮製，魚肉鮮嫩。
鹽焗紅蟳蟹（$188/隻），鮮香多膏。
實力拍檔加持
除咗導演同兩位女主角，「情敵勸退師鐵三角」都大有來頭。小龍憑去年同毛姐合演嘅《黃金花》，成為金像獎「最佳新演員」，今次佢飾演其中一名情敵勸退師，擅於分析。「我嘅角色係一個富二代私生子，最叻係講哲學同分析，角色係一個對感情不忠嘅產品，但又要去勸走人哋嘅小三，所以都幾得意。」
一個曉之以理，曾經贏得「劇后」嘅Grace，所飾演嘅角色就負責動之以情。「我係好識去牽動其他人嘅情緒，所以當小龍嗰套唔得嘅時候，就到我出馬。」
而佢哋兩位，都係為German工作。「我嘅角色叫『木村』，係劇中『情敵勸退師事務所』嘅老闆，因為個角色名，初時我就用一個型啲、Chok啲嘅方式去演，但係導演一睇到就stop咗我（導演：「因為你嘅型係喺裏面嘅，Chok咗出嚟就冇咁好。」），所以o依家我係冇咁型嘅。」
由於劇迷反應熱烈，舞台劇早前仲加場應市，同時加開演後座談會，為演藝學院戲劇學院發展基金籌款。German、Grace、淑儀老師同小龍都係演藝學院嘅師兄師姐，自然樂於為母校出力。
喺圍讀時已令劇組成員笑聲不斷，German同小龍亦未能倖免。
抹茶水晶球、冰粉及鮮生果粒（$58/位），清新降溫嘅甜品，最啱炎炎夏日。
遼參蔥油伴麵（$328），烹煮得入味嘅遼參配上惹味嘅蔥油伴麵，極具特色。
紅燒肉伴素寶塔肉（$238），素寶塔肉實為冬瓜，內裏係雜菌及蔬菜。
大都淮揚 地址：灣仔港灣道1號會展廣場8樓 電話：26280218
