為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2019 年 07 月 27 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

到成都重慶行街

最近因公事頻頻上成都,但每次都匆匆忙忙,冇乜時間行街。七月中有機會再去成都和重慶,終於可以近距離睇吓城市發展,亦趁機到兩市嘅地標商場行吓。

九龍倉集團(0004)喺香港有兩個主要商場項目海港城和時代廣場,老香港會記得海港城一帶前身係九龍倉碼頭,「五枝旗桿等」係我哋當年冇手提電話、冇港鐵年代約人經常講嘅說話,而時代廣場原址就係舊電車廠。兩個商場一直表現優異,二○一八年海港城收入增一成,零售銷售升二成四,佔全港零售總額百分之七點七,按平均每呎銷售計可列入全球盈利能力最強商場之一。時代廣場進行大型重組,上年收入持平,可以等重組完成再睇成績。

九龍倉將興建和營運投資物業嘅心得應用於內地,現時全國擁有五個國際金融中心IFS、四個時代廣場及兩個時代.奧特萊斯項目,複製香港嘅成功經驗。我逛嘅成都IFS一四年落成,係公司內地首個旗艦商業項目,正正係用海港城做楷模,着力提供一站式購物娛樂及高端體驗。項目位於成都市中心購物區,地庫直駁地鐵站,而且係兩條線嘅中轉站,人流有一定保證。投資一百七十億元人民幣,總建築面積近七十六萬平方米嘅成都項目,包括商場、三幢甲級寫字樓、服務式住宅以及擁有二百三十間客房嘅酒店。

據九龍倉中國置業助理董事兼總經理侯迅(Christina)解釋,「IFS」係創新(Innovate)、非凡(Fabulous)及共享(Share)嘅合體。商場匯聚超過六百個國際品牌,其中逾一百個為首度進駐當地,有助成都IFS建立優勢。為建立IFS品牌,一八年曾與八個國際品牌合作推出限量版聯名產品,亦定期刊印自家雜誌,分享時下趨勢及其他資訊,另不時舉辦有特別概念嘅藝術展覽及文化活動。

今次有時間去埋重慶,九龍倉喺呢度營運時代廣場和IFS,其中重慶IFS位於江北嘴金融核心區,總建築面積超過六十六萬平方米,除購物中心外另有五幢甲級寫字樓及一間酒店。重慶人對於江北嘴非常看重,稱呢度為「長江上游陸家嘴」,而除咗係經濟中心,人文氣息亦濃厚,有大劇院、科技館、美術館,以及十萬平方米嘅中央公園。雖然項目同輕軌連接,但因應內地消費者購物鍾意揸車,所以設有逾二千二百個停車位,對於香港車主嚟講真係得個恨字。

內地一線商場租戶組合近年不斷變化,好似成都和重慶IFS,奢侈品牌仍然坐鎮,但中高檔和輕奢品牌佔比愈來愈高。而同香港一樣,商場餐飲比例不斷提高,而且檔次種類非常廣泛,以抗衡網購對實體店嘅衝擊。以體驗出發嘅配套仲有真雪溜冰場、戲院、健身美容院等。

香港係重慶最主要嘅境外投資來源地,當地人對香港好熟悉,對海港城當然唔陌生,甚至稱重慶IFS為「精品版海港城」。喺成都重慶行街,有一點同香港唔同,就係大家都比較閒適,可以慢慢睇輕鬆買。

重慶(左)及成都IFS。