為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2019 年 07 月 21 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

進擊の新人

娛樂圈吸引力驚人,所以人才輩出,而且每年都有新血加入,今年嘅「新人王」,首選已加盟范振鋒(Ricky)旗下、科班出身嘅黃進林(Michael)。廿三歲嘅佢,除咗推出新曲,仲涉足音樂劇嘅演出,潛力無限。

今次「Paco巨星飯堂」,我請嚟Michael、Ricky同范太李思欣,去到位於銅鑼灣嘅「鮨秀」,品嘗出色嘅日本料理,暢談發展大計。

Ricky同思欣二人同心,開設娛樂公司,旗下新人Michael就因潛力無窮,而獲得唔少演、唱機會,成為矚目新星。

 

初戀無限Touch

加盟Ricky旗下後,Michael最近推出新歌〈分開紀念日〉,由名牌監製舒文打造,製作班底強勁。面對要求嚴格嘅舒文,Michael坦言:「最初都有啲壓力o架,佢好着重每個音嘅吐納,不過亦都好照顧新人,不斷提點同教導我嘅演繹方式,令我克服到呢一關,亦都吸收到好多新知識,獲益良多。」

歌曲講述初戀,以Michael嘅初戀經歷為故事藍圖,「我嘅初戀係帶遺憾嘅,所以喺收到歌詞同聽旋律嗰一刻,都忍唔住喊。」

年輕人係要把握青春去追夢,Michael就係其中一個例子。「想俾一段時間自己去追夢,夢想好緊要,若如果唔去試吓,日後就會後悔,所以我會盡力去做。我都想藉自己嘅故事,去影響身邊嘅朋友,因為我有好多朋友,都有夢想但唔敢去做,我會同佢哋講:『做咗先,趁仲有時間去做』。

「我自細就鍾意音樂,無論係學習樂器定係唱歌,都俾到我正能量,所以我好快就鎖定追求音樂造詣,作為自己嘅人生目標。」

唱而優則演嘅Michael,一面忙為新歌宣傳,同埋積極籌備第二首歌,同時他又要兼顧兩套音樂劇嘅綵排。繼早前有份參演導演高志森嘅春天實驗劇團《來自廣州的輝煌》音樂劇,仲去到大灣區巡演;今年八月底上演嘅音樂劇《小飛俠》,劇中佢冧莊飾演「小飛俠」,與一大班小朋友同台演出。

我同三位嘉賓,去到位於銅鑼灣嘅「鮨秀」,品嘗出色嘅日本料理,暢談發展大計。

 

Michael嘅「地標」新曲〈分開紀念日〉,由製作、拍攝MV都十分認真,才華、誠意滿分。

 

 

 

白身魚伴黑松露海膽醬($160),屬師傅創意菜式,各種食材嘅配搭,造就獨特味道。

 

梅福吞拿魚腩蓉($180),以脆餅夾吞拿魚等配料,外脆內鮮,質感層次豐富。

 

岩手縣岩蠔($120),鮮甜爽口。

 

Busking儲經驗

畢業於香港演藝學院Excel音樂劇課程嘅Michael,三年前開始街頭busking,自彈自唱,以音樂會友。「我好鍾意喺街頭唱歌,希望發放正能量俾大家,喺街上見到有啲朋友仔,放工一臉倦容,仍然停低聽我唱歌,令我感到好欣慰。」

街上人來人往,面對群眾演唱,Michael鍛煉出膽量,累積唔少演出經驗,留下好多難忘回憶。「除咗練膽量,演唱幾個鐘頭仲可以練氣,對住大量觀眾都唔怕醜,放鬆自如咁唱,對日後表演有好大幫助。某一次我喺中環街頭busking,巧遇陳柏宇,我邀請佢同我一齊jam歌,佢就提議唱『別人的歌』,於是我哋就合唱咗側田嘅〈美麗之最〉。」

o依家事業漸露曙光,Michael表示:「我嘅家人好支持我入娛樂圈,我決定用五年時間去闖一闖,雖然會面對唔少壓力,但係音樂係我嘅鎮靜劑,令我可以重新充滿力量!」

九月中,Michael則會再次前往大灣區,演出音樂劇《喝采》,佢將會飾演陳百強,大唱對方二十多首經典名曲。

 

不論喺香港、外地都有豐富嘅Busking經驗,過程令Michael(右二)學到唔少嘢,終身受用。

 

名師出高徒,Michael嘅結他技巧,師承Joey Tang,係實力嘅保證。

 

山芋吞拿魚($160),屬舊式炮製手法,口感特別。

 

米茄和牛粒($320),相當惹味。

 

Partner兼兩職

Ricky同思欣結婚多年,二人互相影響,Ricky表示:「結婚之前,我唔鍾意旅行,亦都唔鍾意影相,後來被太太徹底改變咗,啱啱我哋先至去咗泰國旅行。」

思欣就笑說:「佢覺得搭飛機辛苦,去旅行冇得做嘢,搵唔到錢嘅嘛!o依家佢肯同我飛,揸機影相嘅技術,仲靚到連我啲朋友都話好掂!」

二人除咗係人生夥伴,近年連做生意都拍住上,既開餐廳又開娛樂公司。思欣話:「一齊生活咗咁耐,我哋嘅磨合期一早過咗,所以就算係做嘢、做生意,我哋都冇拗撬。」
Ricky就話:「我比佢早起步,所以佢開始做幕後嘅工作,我都不時俾吓意見佢,我就負責發掘一啲好似Michael咁有潛質嘅新人,同埋電影嘅幕後工作。」

由生活到工作,Ricky同思欣都同步,確實難得。

 

早前Ricky四十六歲生日,思欣將慶生畫面同網友分享,順便放閃。

 

雖然近年開始做多咗幕後嘅工作,但Ricky同《兄弟幫》一眾兄弟,仍有繼續主持節目。

 

天婦羅穴子($150),皮薄多汁。

 

吞拿魚下巴($220),皮香肉嫩。

 

皮剝魚壽司($90/件),加上魚肝炮製,更見美味。

 

鮨秀
地址:銅鑼灣恩平道42號亨利中心12樓
電話:23898800 / 23898820