為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2019 年 07 月 20 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

平安董事會的「三不」和「四個合」

港交所喺二○一三年推出《環境、社會及管治(ESG)報告指引》,香港上市公司一六/一七財政年度嘅業績報告首次加入ESG披露。經過最少兩年嘅實踐,港交所正就相關上市規則和指引進行諮詢,希望加強披露。上市公司之中當然有部分係趕在死線前按要求交功課,但亦有好多具有良好管治理念嘅公司提前刊發報告,披露內容亦超越港交所要求。

事實上,可持續發展係投資趨勢,唔少投資者(特別係機構投資者)除咗睇公司嘅財務業績,亦愈加考慮ESG表現。呢點唔止係企業責任,環境和社會事件,例如氣候暖化對農畜食品、勞工問題等對公司業務都有實質影響,對未來業績有預示作用。難怪恒生可持續發展企業指數系列推出後,已被投資者視為重要參考標竿。

我哋分析一間公司睇數字外,仲希望了解董事會和管理層,因為佢哋每一項決策都影響公司前景。而要落實可持續發展,更加要依靠董事會和管理層。以中國平安(2318)為例,公司一貫着重企業管治,董事會將自己定位為公司戰略嘅方向盤,負責制定發展願景和抱負,並引領集團駛向正確方向。為增強決策嘅中立性和科學性,並降低決策風險,平安董事會開會前都用大量時間先溝通,並運用中介進行財務、法律等方面嘅盡職調查,為事項提供獨立專業意見。

中國平安董事會和管治架構好早建立,原因係公司屬於最早期引進外資嘅國內金融企業。公司喺九三至九四年董事會換屆時,面對股東、董事會及管理層定位問題,當時決定逐步建立國際標準嘅董事會體系,以「三不」原則:股東不向公司派管理層、不與公司進行關聯交易、不參與公司日常經營管理,以完善當時嘅管治制度。

至於「四個合適」,第一係合適定位,即係明確角色和權責。第二係合適人選,確保一個多元化和專業嘅董事會,可以作出周全嘅決策。合適嘅董事唔一定來自金融保險界,公司十五位董事各自在專業範疇擁有知識,其中包括不同學者,好似公司早前委任人工智能專家、北京大學劉宏教授為獨董(待保監會核准),可以為董事會引入真知灼見。

第三係合適流程,董事要掌握公司經營狀況至可以做決策。平安董事會和管理層有良好嘅日常溝通機制,而對於重大事項,喺初步形成議案過程中,管理層會提前聽取董事意見和建議。董事每年並會組成基層機構考察組,了解一線員工和客戶情況。最後,亦係最重要一點,係合適文化。董事會文化決定佢傾向控制型、經營型、戰略型……管理,平安董事會注重前瞻戰略研究,因此將工作重點放於產業趨勢、科技變革潮流等,確保公司能夠立於潮流先端,敢於創新以尋找新價值來源;為此公司董事會營造一個暢所欲言、樂於分享和尊重互信嘅文化氛圍,鼓勵Out of the Box思維。

中國平安多年來屢獲最佳董事會和最佳企業管治獎項,與董事會嘅作風文化、決策質量大有關係。