三十四歲的楊潮凱，一三年跟拍拖十一年的老師女友江玉儀拉埋天窗，去年三月更榮升爸爸，多了個前世情人Catherine。正值囡細老婆嫩，但阿凱月前卻選擇離開讓他有穩定收入的無綫，實行自己工作自己接。「有咗小朋友，係有壓力o架！但我想自己可以有多啲話事權，好彩老婆好支持我做呢個決定！」

事實上，楊太的確是阿凱最大的後盾，除了力撐老公離巢外，阿凱將於書展推出他的處男寫真集《Go With The Flow》，既以內褲上陣，又玩射水濕身，賣肉騷肌，但她依然完全無懼老公被人睇蝕。「佢直情話正！勁贊成！」呢個老婆真抵錫！

跟老師女友江玉儀於一三年結婚，至今相親相愛十七年。「老婆一直無限量支持我，我同佢講拍寫真，佢勁讚話正！」

速減廿六磅

入行十年的楊潮凱，月前不再做無綫「親生仔」，趁約滿離巢外闖。「我想自己經歷多啲，可以有多啲話事權！人生每個階段，都應該有啲衝擊、有啲突破！」

身體力行，趁着本月十七日開鑼的書展，阿凱將推出他的處男寫真集《Go With The Flow》。「呢個名係我起嘅，go with the flow（隨遇而安）係我自己經歷咗十年起跌後，對人生嘅睇法，同埋領略到嘅總結。」

他續說：「出寫真呢件事，真係機緣巧合。我呢十年影落唔少相，都有諗過出本相集，但有好多版權嘅問題要解決，仲未實行到；點知早排Ronald（攝影師林子賢）就問我有冇興趣出書，我考慮咗幾日就應承咗！」

最後團隊決定飛往檳城取景，可是在出發前，阿凱卻先要處理身形問題。「我今年初，因為演《法證先鋒IV》做一個智障肥仔要增肥，所以我應承出書嗰陣，身體狀態完全唔得！我驚出嚟嘅效果未如理想，我就用咗廿三日嘅時間嚟操fit自己，仲要戒鹽、戒油、戒糖，結果由一百七十磅減到一百四十四磅。雖然呢個都未係我認為最fit嘅狀態，但我深信，呢個係天父畀我嘅一個鍛煉，我真係問心無愧！」

在檳城逗留的六天，他們花了四日時間進行拍攝，逾千張照片中，不少都是即興構思出來的畫面。「好多時都係咁啱個場景，同個feel適合就去拍。例如：我哋本來冇諗過有牀照，但當時大家都覺得啱feel，就諗到着內褲去影。我從來冇喺幕前着過底褲見人，今次係第一次！不過，我着三角（內褲）唔靚，所以就着咗條平腳。好似另一個濕身嘅shot咁，我哋原本都冇諗過要淋水，都係即場覺得啱feel諗出嚟就影。」

楊潮凱將趁書展推出處男寫真集，更首次在鏡頭前以內褲亮相。「我着三角（內褲）唔靚，所以着咗條平腳。」

牀照場景是他和拍攝團隊的即興構思。「最難係擺甫士，我唔係專業模特兒，拍劇仲易啲。」