黃嘉樂女友好鬼馬

喺無綫熱播劇《白色強人》中，扮演楊逸滔（郭晉安飾）徒弟林學祈嘅黃嘉樂，於現實中，同攝影師女友Samantha打得火熱，佢仲話計劃短期內同女友拉埋天窗添。不過，東姑發現外間對Samantha嘅評語就麻麻，間唔中會做婚禮攝影嘅佢，就試過畀客人投訴，話佢性格「寸」不特止，幫人影婚宴相嘅時候，更加喺酒店房內煲煙，令新娘同埋啲親戚都好唔高興囉。

其實，Samantha都有鬼馬嘅一面。早前，佢就喺社交媒體，自爆喺相機篋內藏有大量安全套，引起網民無限遐想。不過，原來呢樣嘢只不過係工作需要，大家唔好心邪！佢解釋話，呢個係落大雨時，保護攝影器材嘅最佳方法，仲拍片示範點樣用安全套，套喺相機嘅閃光燈上添，佢更加出post講：「落狗屎又要出動絕招，唔好再問點解我個相機喼（篋）入面點解有避孕套。」呢個謎團，唔知黃嘉樂有冇一刻懷疑女友呢？

黃嘉樂同Samantha拍拖兩年以來感情穩定，仲已經開始計劃結婚添！

有人客大爆，黃嘉樂嘅攝影師女友Samantha，喺開工時，煙不離手，惹人討厭。

Samantha畀客人喺社交媒體數佢態度惡劣以外，仲話佢好鍾意喺酒店房一面煲煙、一面影相。

原來呢啲避孕套只係用嚟幫啲攝影器材避雨，敬請大家唔好心邪！