為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2019 年 07 月 11 日

老師仇警恐教壞學生 「反修例」引發通識科爭議

好多學生近期積極參與有關反修訂《逃犯條例》嘅遊行示威,部分更不顧一切衝擊警方防線,甚至暴力攻入立法會。全國政協副主席兼前特首董建華形容,呢啲都係通識教育「徹底失敗」,有必要改革。

不過身為行政會議成員嘅羅范椒芬就唔係咁睇,力撐通識有助學生批判思考,反而一下鞭落社交媒體度,認為當今社交媒體嘅影響力,遠比通識科為大。即時引起一番「通識科存廢與否」爭議。

究竟係社交網嘅錯?還是通識科有問題?大家仲爭論緊嘅時候,身為考評局通識科委員會主席,以及通識教育教師聯會外務副主席嘅賴得鐘,畀人發現佢喺社交網發表「黑警死全家」言論,即時辣㷫唔少警察。四個警務人員協會更發炮還擊,去信教育局,要求局長楊潤雄嚴厲譴責佢。

喺嘉諾撒聖心書院任教通識同歷史科嘅賴得鐘,事後雖然馬上刪除相關訊息並公開道歉,又主動辭去考評局通識科委員會主席,同埋通識教師聯會外務副主席職位。

但係佢嘅言論已引起教育界同家長議論紛紛,好多家長認為佢身為老師仲係教通識科,竟然公開鼓吹仇警,自己都做唔到持平討論社會問題,恐防會教壞細路,灌輸偏激思想畀學生。而呢啲擔憂,正正係唔少教育界人士早有所顧慮,尤其係一四年發生佔領事件後,出現不少政見偏激嘅老師。

咁到底通識科有冇教壞學生哥?是否需要全面檢討甚至廢除?一手接生通識科嘅羅范椒芬,就繼續跟董生唱反調。有政壇人士就為之側目:「佢前上司都話咗有問題,反而佢仲死撐,唔通公務員推政策真係唔會錯?」該政壇人士形容,社交網係有問題,但不代表通識完全沒有問題,是時候要檢討。

專責教通識科嘅賴得鐘,因在自己的社交網帳戶貼出「黑警死全家」的標題及言論,惹來警方及社會各界批評。

 

 

 

董建華認為他任內推行嘅通識教育係「徹底失敗」。

 

羅范椒芬分析年輕人反對修例,係擔心失去自由,呼籲政府應好好利用網絡,去了解多啲佢哋嘅心聲。