為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2019 年 07 月 14 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

強人CP

以專業人士為題材嘅劇集,一直係港劇嘅優質標誌,最近熱播嘅《白色強人》,以醫生作主角,平均收視率高達廿八點,成績理想,又再印證「專業劇光環」嘅威力。

今次「Paco巨星飯堂」,我就邀請劇中唯一能夠專心談情嘅CP(Couple):何廣沛及馮盈盈,去到位於尖沙咀嘅「Harlan’s」,品嘗特色西餐,細說CP背後嘅故事。

廣沛同盈盈喺劇集《白色強人》中,奉旨談情,成功建立熒幕CP嘅形象。

 

男友幫手

兩位嘉賓喺《白色強人》中,都係飾演心胸肺外科醫生,而盈盈喺揣摩角色嘅時候,就有一個「先天優勢」。「哈哈!喺現實生活中,我男朋友係一個內科醫生,今次扮演醫生角色,佢都幫咗我好多。佢俾好多貼士我,好似係做醫生講嘢,最好唔好有懶音,因為你要同病人或家屬解釋,你一定要好專業, 語調要穩重⋯⋯所以我特別努力去練習自己嘅發音。

「另外,好多專業嘅醫療用語,我都唔識得讀,於是我就send message俾佢問,而佢又可以好快好準確咁話我知,我都要多謝佢。而且因為拍呢套劇,我先明白佢嘅工作,原來有咁多複雜嘅步驟,亦都令我哋互相了解多咗,亦多咗體諒對方。」

相對地,雖然廣沛冇盈盈嘅優勢,但佢都有所體會,「我同劇集嘅監製,之前已經喺《律政強人》合作過,嗰次我飾演律師,今次就飾演醫生,兩次都可以做專業人士,同唔同嘅前輩合作,學到好多嘢。

「今次我同盈盈一收到劇本,監製就話:『你哋咩都唔使理,專心拍拖就OK嘞!』所以劇情入面嘅權鬥,完全冇我哋份,我哋係專責談情嘅。」

廣沛同盈盈喺劇集《白色強人》中,奉旨談情,成功建立熒幕CP嘅形象。

 

我帶兩位嘉賓去到位於尖沙咀嘅「Harlan’s」,品嘗特色西餐,暢談拍攝劇集嘅幕後故事,及2019年下半年嘅計劃。

 

劇集以醫生作題材,除咗「青春線」嘅廣沛(前右一)同盈盈(不在圖中),仲有馬國明(前左一)、郭晉安(前右二)、唐詩詠(後中)及李佳芯(後右)等實力派擔綱。

 

除咗協助演繹角色,盈盈(中)話男友Martin(左)仲100%支持自己發展事業,對佢同廣沛(右)拍kiss戲都冇詐型。

 

煙燻帶子及黑線鱈魚伴鱒魚子、金菜頭及石榴氣酒啫喱($288),帶酸味嘅頭盤,夠晒開胃。

 

法式鴨肉凍批配香煎鵝肝及無花果,伴梨醬及多士($288),無花果同梨醬,成功抵消鵝肝嘅膩感。

 

慢煮豬腩肉炒緬因州龍蝦配脆蝦米及羅望子醬($288),羅望子常用於泰國菜,味道帶酸,配上豬腩肉則有醒胃感。

 

奉獻初吻

演技有所精進,廣沛不忘大讚拍檔盈盈。「佢奉獻咗熒幕初吻⋯⋯俾我(盈盈:「益咗你啦!」),哈哈!拍嘅時候都幾凍吓,又乾,於是我就搽多少少潤唇膏,等佢kiss得舒服啲。」

盈盈就話:「埋位之前,廣沛好專業o架!佢知道我緊張,會盡量令到拍攝氣氛relax啲,等我快啲入戲吖嘛,所以成個過程都好smooth。

「呢個熒幕初吻,反而唔夠另一場戲拍得深刻,因為拍之前一晚,我媽媽因為急性心臟病發而入院,要緊急做手術,所以嗰晚我就喺醫院陪媽媽,之後就好擔心咁去開工,嗰一刻我深深體會到『戲如人生』嘅意思。」

盈盈話多得真.醫生男友Martin,令佢能夠完美演繹劇集嘅醫生角色。

 

為套劇奉獻熒幕初吻,盈盈話拍攝嘅時候,堅持到導演嗌Cut,嘴唇先同廣沛嘅分開,佢仲笑稱:「佢(廣沛)梗係同監製好friend,先可以錫我咁耐!哈哈!」

 

劇集以外,盈盈早前同「師姐」麥明詩,遠赴荷蘭拍攝旅遊節目《荷蘭好玩》,將於本月底播出。

 

 

 

慢煮伊比利亞豬頸肉伴脆火腿,慢煮蒜泥及酸梨醬($428),味道層次豐富。

 

赤麵豉燒法國鮟康魚伴中東米龍蝦忌廉汁($468),屬fusion菜式嘅示範之作。

 

暗黑廚神

o依家馮媽媽康復得非常好,令盈盈都鬆一口氣,佢仲話:「o依家我會推啲friend嘅飯局,都係為咗返屋企食飯,陪吓媽媽。自己下廚?我好少o架!以前讀營養學,要做煮食實驗,我試過煎腸仔、做沙律醬同雪糕。不過我會做啲好特別嘅口味,係黑暗料理!我做過夏枯草啫喱波,係我嘅得意之作嚟o架!」

至於廣沛就表示:「我得閒都會煮吓嘢食,雖然唔係叻,不過煮pasta我都OK嘅。o依家成日要開工,都冇乜機會入廚房。我想累積多啲演戲嘅經驗,希望日後有機會演出啲武打動作戲。」

而好動活躍嘅盈盈就話:「我最想演聾啞人士嘅角色,因為好多人投訴我講嘢又多又大聲,所以我為咗觀眾着想,都想靜番吓。而且演聾啞人士,係最考演技嘅,冇對白之下,我只可以靠肢體語言、眼神同表情去做戲,係一個大挑戰。」

正在拍攝另一重頭劇《大醬園》嘅廣沛,話兩套劇都可以同唔同嘅前輩合作,令佢嘅演技繼續有進步。

 

喺拍攝中嘅新劇中,廣沛同合作慣嘅朱晨麗再飾演情侶,加上一眾實力演員,又係高質素嘅保證。

 

56度慢煮法國有機羊腿肉($468),羊腿肉上為開心果碎,令菜式添上層次感。

 

慢煮美國頂級牛柳,配黑醋炒薯仔、乾蔥及黑松露牛肉汁($488),牛柳嫩滑juicy。

 

西班牙紅蝦意大利扁麵配風乾鱈魚子($398),風味一流。

 

Harlan’s
地址:尖沙咀彌敦道100號The ONE 19樓
電話:29722222