一君成熟時
我相信，電影《香蕉成熟時》系列係唔少香港人嘅集體回憶，雖然系列嘅男主角鄧一君，早於〇五年淡出演藝圈，但佢演出過嘅影視作品，包括o依家正在重播嘅劇集《烈火雄心》，依然深入民心。
一君告別青年歲月，今年仲進軍飲食業，開餐廳「一君士多」，主打具香港特色嘅食品，短短數月就開設分店，成績理想。今次「Paco巨星飯堂」，我就去到一君位於尖沙咀嘅分店，品嘗屬於香港人嘅口味。
一君近年進軍飲食業，繼今年初喺油麻地開設第一間「一君士多」，早前再喺尖沙咀開設分店，佢仲有計劃繼續擴展版圖，相當厲害。
不惜工本
講到最初開餐廳嘅念頭，一君表示：「我一家人，包括太太同個女都好鍾意食嘢，喺一個偶然嘅情況下，俾我遇到一個廚，佢嘅車仔麵好好食，我覺得好好食啦！於是就同佢傾，仲一拍即合添！跟住就喺油麻地開咗第一間舖。
「為餐廳取名『士多』，係因為我細個嘅時候，士多係乜都有得賣嘅，o依家餐廳都係咁，除咗車仔麵，我哋仲有飯、小食、甜品，全部都係一啲有香港特色嘅食物。」
要成為一間有特色嘅食店，一君都花過唔少心思。「第一間舖開幕嘅時候，啱啱係農曆新年，咁我就諗咗啲有新年氣氛嘅麵食，『富貴麵』同『蠔華麵』就誕生咗。過年最緊要意頭，菜名就符合晒要求，配料就用澳洲鮑魚、花膠、花菇、廣島蠔，成本都幾高，不過都係分別定價$88同$68，蝕住做都keep住呢個價，用其他菜式回本啦！
「o依家兩個麵食都成為咗我哋嘅招牌菜，加埋其他傳統嘅車仔麵，我哋都想俾多啲選擇客人揀。」
我去到位於尖沙咀嘅「一君士多」，品嘗一君有份設計嘅菜式，細嘗佢眼中嘅香港之味。
〇六年結婚嘅一君，同太太育有囡囡Kristen，轉眼已經十一歲，而佢有開餐廳嘅念頭，跟囡囡同自己都愛吃有關。
一六年，一君小試牛刀，於中環開麵檔，當時佢已經全心投入，成為後來開餐廳嘅契機。
富貴麵（$88）嘅配料為澳洲鮑魚、花膠及花菇，一君話製作成本甚高，但首間餐廳開業時正值新年，有賣大包及賀年意味，之後仲成為招牌名菜。
一君炸蛋（$28）以鵪鶉蛋製作，屬一君嘅童年回憶，用淮鹽為炸蛋吊味，甚具特色。
另一招牌麵食蠔華麵（$68），同樣是由新年菜轉化成招牌菜，廣島蠔配上花菇，甚受食客歡迎。
包羅萬有
我食車仔麵，對魚蛋嘅要求特別高，但係o依家有唔少食店嘅出品，當中都有化學成份，要食到高質素嘅「天然魚蛋」，難度極高。一君就話：「我都試咗好多魚蛋，先決定用o依家嘅供應商，呢隻魚蛋加咗陳皮去整，入口仲有啲甘香味，襯埋用豬骨、雞腳同雞殼熬製嘅湯底，我對質素好有信心。另外，除咗粗、幼麵等基本麵條，我哋仲有薯粉、銀針粉等麵食俾人揀，配搭多咗好多。」
除咗車仔麵，分店仲有小食同飯供應。「呢間舖啲客坐得舒服啲，所以我想有唔同種類嘅食物，除咗有『士多』嘅效果，都有主題嘅感覺；油麻地嗰間舖細啲，就以香港嘅街頭小食，好似雞蛋仔、魚蛋做主打。」
自〇五年離開娛樂圈，一君投身保險業，後來仲攻讀碩士課程，現為專業理財顧問。
近期深夜熱播嘅劇集《烈火雄心》，劇中一君同古仔嘅兄弟情，夠晒感人；現實中二人都因而成為好兄弟，感情深厚。
今年初首間餐廳喺油麻地開業，古仔都親臨現場試菜，為好兄弟打氣。
四寶麵（$48），以蘿蔔、豬皮、魚蛋及豬腸作配料，一君挑選加入陳皮製作嘅魚蛋，令味道同質感都有所提升。
豬手撈麵（$58），屬徇眾要求嘅菜式，一君稱開業初期冇將豬手列入菜牌，經食客要求下，追加南乳豬手，繼而有撈麵登場。
個人特色
雖然一君退出娛樂圈多年，但係《香蕉》系列深入民心，佢都有將成名作列入菜單。「其實係將我嘅童年回憶整合啫，我細個同屋企人去餐廳食飯，最尾都會叫香蕉船做甜品，一定要有嗰把小型油紙遮，我相信都係唔少香港人嘅童年回憶嚟嘅。」
設計菜單，一君落足心機，連平時下廚，佢都好有heart。「我會趁老婆唔喺屋企嘅時候煮嘢食，平時嗰度係佢話事吖嘛。我嘅拿手菜係糖醋排骨，工序係繁複啲，但係完成嘅時候會好滿足。煮個麵嗰啲我唔會親自落手，呢啲留番俾姐姐做都得啦！」
九歲就入行嘅一君，憑《香蕉》系列成名，當年仲同女神之一楊采妮合作（上圖），後來佢毅然離開娛樂圈，真係少啲決心都唔能夠成事。
蘑菇芝士雞翼（$32），將芝士及蘑菇釀入無骨雞翼，肉味滲透入餡料之中，外脆內軟。
蔥油豬扒飯（$58），經醃製一日嘅厚切豬扒，配上自家製嘅蔥油，既惹味又入味。
香蕉成熟船（$48），一君話香蕉船係佢童年回憶嘅一部份，而《香蕉成熟時》則為佢嘅成名作，兩者二合為一就成為菜名。雪糕味道可從荔枝、芒果、朱古力、雲呢拿及Cookies and cream中五選二，配合唔同人嘅口味。
一君士多
地址：尖沙咀堪富利士道6號地下
電話：26731688
