為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2019 年 07 月 04 日

《逃犯例》修唔成 「明日大嶼」慘陪葬

備受關注的「明日大嶼」五點五億前期工程研究撥款,本來有望喺今個暑期獲開綠燈,部分工程顧問公司搵定人埋位等「開波」。可惜《逃犯條例》風波牽連立法會多次被示威者包圍,連帶立法會財委會亦癱瘓,幾十項撥款申請,包括多項民生工程被積壓批唔到;財委會主席陳健波話顧及到議員嘅情緒,今個立法年度都唔會審議「明日大嶼」。

消息一出,反應最大嘅係一直望到頸長嘅工程界,該界別立法會議員盧偉國承認,近日收到唔少業界WhatsApp,話對撥款延期好失望,又擔心十月中復會後因為臨近區議會選舉,泛民實扭盡六壬玩拉布,變相呢五億幾撥款凍過水。

批錢無期,部分請咗人嘅顧問公司見工作量唔夠撐,惟有手起刀落炒人止血先。盧偉國無奈話,發展「明日大嶼」所在嘅中部水域查實上屆政府已提出,「開發土地嘅研究係為未來籌謀,等咗幾年都無聲氣,唔急就假!」

香港經濟靠唔少重大基建支撐,盧偉國計過數,工程界每年計埋政府同私人工程,大約需要二千多億元項目維持業界飯碗。雖今年到o依家為止,立法會工務小組已審議咗約千四億元工程,但財委會只通過咗其中六百幾億。最近建造業工會亦開記招,話業內部分工種開工不足情況嚴重,「工程量時高時低,令唔少建築師樓、則師樓、工程顧問、承建商吊緊鹽水;總之一係飽死,一係餓死!」他苦笑說,建造業有成四十萬工人,若然無飯開,唔少家庭都受累。

「明日大嶼」今個暑期「被陪葬」其實只係冰山一角。盧偉國指出,仲有多項工程排住隊等批,包括西九文化區興建綜合地庫及其他相關工程合共約一百八十億元撥款申請、將軍澳海水化淡工程約七十七億元,仲有橫洲公屋、港大醫學院擴建、理大建新醫護教學大樓,以及四間醫院等待重建,包括威爾斯親王醫院第二期重建等。盧偉國慨歎:「以上工程全部對民生影響深遠,若然批唔到,最終受累都係升斗市民!」

《逃犯條例》風波牽連立法會財委會亦癱瘓,幾十項撥款申請包括多項民生工程被積壓批唔到。

 

部分工程顧問公司搵定人埋位等「明日大嶼」前期工程研究撥款,可惜最終「食白果」!

 

盧偉國(右)收到唔少業界WhatsApp,話對撥款延期感失望。