為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2019 年 07 月 06 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

勛龍憑熱壓模 攻節能車市場

上星期五上市嘅勛龍汽車(1930)主要業務係做ODM定制模具,其中營業額五成七來自汽車模具。公司開宗明義專門因應「汽車輕量化」趨勢而生產熱壓模具。對於汽車輕量化呢項技術我認識唔深,不過有機會聽勛龍創辦人兼主席林萬益(Kevin)簡介,汽車輕啲固然可以慳油,但要同時保持到原本汽車嘅結構強度同安全性能,就係技術重點。

現時環保意識日盛,汽車節能係必然趨勢,有報告指一架車(包括傳統和新型汽車)重量每減輕一成,燃料消耗最多可以減少百分之八。汽車輕量化亦都針對電動車嘅續航力瓶頸,令汽車充電後行走里數更長。

Kevin謙稱公司規模仲細,而熱壓模具喺市場佔比仍然好低,但由於公司夠專注,所以上年熱壓模就喺中國市場排第二。新能源汽車和輕身車係一個增長市場,如果能夠在此確立龍頭位置,就可以爭取更高增長空間。有市場為何無人爭?林兄不諱言模具公司好多,但好多行家話做模具等於幫人做印銀紙機,所以做做吓會心郁想向下游發展,變相同客戶爭零部件生意,結果客戶唔願意再落單,模具部分有時變成副業,佔比愈來愈細。勛龍決定專心做模具,以汽車和家居電器為主打,到今日同類業務而規模相當嘅,市場上差不多絕無僅有。

公司專一,客戶又如何?公司汽車模具最大客戶海斯坦普,係全球主要汽車零件生產商之一,彼此合作十年,建立穩定合作關係。一八年公司對海斯坦普銷售額佔比逾三成六。過去三年對此客戶銷售額一路增加,但因總銷售上升和新增客戶,佔比由四成幾一直降低,亦反映公司對單一客戶嘅依賴略有減低。當然爭取新客成本較高,短期會影響毛利率,所以公司兩大客戶海斯坦普和海信都維持長期合作,另外積極培養新客關係,爭取日後提高毛利率。

林兄來自台灣,公司創始股東亦主要係台資公司,二○○二年到內地發展,現時喺昆山及青島設廠。中美貿易戰影響唔少內地廠商亦拖累整體經濟,但對勛龍影響不大,一來公司直接出口比例好低,二來公司分別做汽車和家電,特別係電視機外殼模具,可以分散單一行業周期對業務嘅影響。勛龍對於汽車輕量化應用模具有信心,上市後會在昆山增加一個工廠,籌集資金中八成二用作購買新設備及軟件,繼續提升產能及競爭力。

林兄係技術專才,自己十七歲出嚟打工,屬於科班出身,但非常着重學習和人才。公司係技術公司,研發團隊有博士、碩士和中台兩地本科生,因此擁有超過六十項專利。佢奉行「員工是上帝」原則,對於員工有四大關注,就係希望佢哋保持健康、家庭和諧、工作開心,最重要係終身學習。所以佢自己都以身作則,在復旦大學讀咗個EMBA課程,在技術之上提升企管實力。健康方面,林兄鍾意跑馬拉松,我問佢上市過程係咪好似一場馬拉松,佢認為似跑咗場越野賽,沿途開闊眼界,發現好多公司將來發展嘅可能性。

勛龍主席林萬益(中)認為上市過程好像一場越野賽。