為善最樂，所以香港有各種慈善團體，為社會服務。今次「Paco巨星飯堂」，我就邀請到應屆仁濟主席王賢訊（Vincent），同首屆擔任仁濟總理嘅前財經主播鄺晶晶，聯同二人嘅另一半：親子漫畫《南山七小福》作者朱穎詩（Vincci）及潘偉業（Albert），去到位於中環嘅「怡紅院火鍋料理」，品嘗特色火鍋，細說行善同生活點滴。

Vincent（左一）係應屆仁濟主席，而前財經主播晶晶（右二）就首年任仁濟總理，二人均稱負起重任壓力都大，幸好有另一半Vincci（左二）同Albert（右一）嘅支持，成為佢哋行善嘅後盾。

仁者義行

月前上任仁濟主席嘅Vincent，表示仁濟扎根荃灣五十年，佢上任後希望多推廣義工服務。「每屆主席都好雄心壯志推好多新project，但我反而希望優化善團本身舊有嘅制度，當然新嘢都會做，跟足口號『仁者義行．傳揚愛心』，『仁者義行』係希望推廣更多義工服務。

「雖然仁濟係有五十幾年歷史嘅善團，但喺義工方面仲係好baby，相比起其他善團仲係一個初階；至於傳揚愛心嘅理念，係希望有多啲好似Paco咁嘅名人一齊合作，藉住唔同機會宣揚仁濟服務，等香港巿民多啲了解我哋。」

晶晶係經Vincent邀請加入仁濟，佢坦言：「因為我同老公一向都有做開善事，今年加入仁濟，係希望貢獻社會，為基層服務；其實我喺呢方面都係新丁嚟，所以要跟主席學嘢，如果唔識要佢帶領吓。

「啱啱就職兩個月，暫時唔算太忙，但真係有很多會開，因為我哋每人要負責一至兩個範疇嘅服務工作，一年要開八次會，另外大會一年要開十二次，仲有三至四次嘅校董會，所以有時要老公幫手湊小朋友，好在佢湊得都幾好。」

我帶四位嘉賓，去到位於中環嘅「怡紅院火鍋料理」，喺相當有特色嘅環境下，暢談領軍行善嘅決心。

為咗發展義工服務，本月初Vincent（左二）身體力行，連同陳展鵬（左三）、梁智鴻（中）等，到石圍角邨探訪獨居老人。

清酒原隻椰子雞鍋（$268），清甜降火。

騸牯黃牛唔同部位，包括吊龍（左、大$388）、金花????（右、大$288）及封門柳（上、$368），各有特色。

芝士．波龍鍋（$488），原隻龍蝦炮製，品嘗過後先加湯，一鍋兩食。

親子減壓

無獨有偶，Vincent同晶晶各自育有三名子女，Vincent育有嘅一女兩子，分別係八歲嘅長女、五歲同三歲嘅囝囝；晶晶就育有兩女一子，分別係五歲同三歲嘅囡囡，以及一歲嘅囝囝。Vincent不諱言，任主席壓力大，要透過子女減壓。「我嘅減壓方法，係返到屋企同小朋友一齊就好開心，有時就同太太去睇場戲，或者去茶餐廳食吓嘢，歎一個菠蘿包同一杯奶茶，已經令我好滿足。」　

問Vincent同太太Vincci嘅育兒心得，佢哋都覺得要俾多啲空間同機會，讓小朋友多嘗試。Vincci表示：「我好鍾意俾佢哋去試、去學唔同嘅嘢，如果佢哋話唔鍾意，我會諗一諗，觀察吓佢哋係咪真係唔擅長，或者長遠係咪真係唔適合佢哋，可能會選擇停一停。」

十二年前Vincent以二十六歲之齡，加入仁濟成為最年輕總理，多年下來都唔少得太座Vincci，擔任其心靈支柱。

Vincent（前左一）表示，晶晶（後右）未出任總理時，已與老公（後中）帶埋小朋友，全家出動賣旗籌款。

因為大女Taylor，令Vincci創作漫畫《南山七小福》，希望大力推動童真嘅可貴。

 

各款餐前小食俱屬自家製，部份包括蒜片和牛粒（後左、$98）、八味豆腐（後右、$68）、蠔油生腸（前左、$68）及芥末青瓜墨魚（前右、$68）。

紫菜墨魚餅（$98），香脆爽口，最啱佐酒。

愛心消夜

至於晶晶平日忙於湊小朋友，現身負服務社會嘅重任，佢話：「可以有充足睡眠，我已心滿意足嘞！」

同時佢不忘大讚老公Albert，「有時做得辛苦，老公會煮消夜俾我食，佢嘅廚藝好了得！」

Albert話：「我會同小朋友親子樂，煮吓烏冬同焗吓蛋糕，過程中我見到佢哋由零開始，去煮好一樣嘢，佢哋會食得特別開心。」

晶晶續稱：「教小朋友方面，我同Vincent佢哋差唔多，我仲覺得陪伴好緊要，所以我同老公會花好多時間陪佢哋，當小朋友覺得有愛，佢哋嘅同理心同埋性格，就係咁樣形成。」

講到下廚，晶晶即時歸功老公Albert，甜絲絲地話老公先係屋企嘅廚神。

晶晶（左二）同Albert（左一）都「碌卡」（人情卡）行善，邀請好友李碧琦（右二）同李志剛（右一），共襄善舉。

餐廳仲設有酒吧，提供唔少有創意嘅cocktail，為女士特別而設。

特色菜籃（$88），作多肉料理嘅平衡。

有特色嘅仲有萵筍蝦滑（右、$88），及一系列日日鮮製嘅餃類：和牛餃（左上、$98）、爆汁皮蛋貢丸（左中、$88）及三文魚餃（左下、$98）。

怡紅院火鍋料理
地址：中環雲咸街43-55號余悅禮大廈地下B-C號舖及1樓102-4號舖
電話：31019968