古媽同佘媽拜龍母拜到肇慶

古天樂（古仔）同佘詩曼（阿佘）喺工作上時有合作，而難得兩位星媽私下亦非常老友，經常約埋出埠旅行，又不時會見面飯敍。

東姑知道，古媽同佘媽喺早前就約埋大班朋友，一團四十幾人組成咗個祈福團，出發去咗肇慶悅城嘅龍母廟參拜。其實，近喺香港嘅荃灣，都有間香火鼎盛嘅龍母廟；不過，嗰日係龍母誕正日，一班人以示誠心，就專誠走到龍母總壇嘅悅城龍母廟拜神。而虔誠嘅古媽，仲供奉大大份祭品，相信為乖仔古仔祈福之餘，亦都係祈求闔家平安、身體健康等等啦！

而外型洋化嘅佘媽，亦有份參加呢個拜神團，成班人拜完龍母，就去開餐歎吓肇慶嘅地道名菜，不枉此行。不過，佘媽嘅乖女阿佘日前就唔多順心嘞，被發現佢喺社交網讚好一張「反逃犯條例」示威集會圖片，跟住慘被內地網民鬧爆。事後，阿佘急速收回讚好，並解話只係唔小心錯點讚，表明自己愛國愛港，唔希望有心人過份解讀。好彩呢個小風波，得到大部分內地網民嘅體諒，仲幫口為佢闢謠，可能都係多得佘媽幫乖女拜得神多，所以自有神保祐喇！

戴住大大頂太陽帽及掛頸風扇嘅古媽，裝備齊全北上到肇慶拜龍母。而祈福團仲有佘媽，以及前《歡樂今宵》藝人吳麗珠。

古仔出名孝順，相信古媽亦為乖仔向龍母祈福。

外表跟作風都洋化嘅佘媽，都有參加拜神團。

虔誠嘅古媽（右），準備咗好大份嘅祭品拜龍母，連吳麗珠都戙起手指公讚勁！

祈福團一場去到肇慶，拜完神就梗係順道開餐，歎吓地道名菜。