為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2019 年 06 月 22 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

天譽的「安居創業」策略

上年在一個內房股頒獎典禮上遇到天譽置業(0059)行政副總裁文小兵,同佢傾到公司點樣開發年輕創客和家庭市場,以及如何建立「青創社區」概念,從而樹立獨特品牌形象。好快又一年,公司喺宏觀環境欠佳情況下再次獲獎,今年文兄未克出席,由同事張蓮順(Julia)代領,大家講起公司近況,知道佢哋嘅「居住+生活+創業」理念仍然不斷發酵。

過去一年,環球經濟不穩加上內地樓市調控,影響一眾內地房地產商。但天譽置業繼續聚焦青年創業社區細分市場,為年輕首置客提供環保、優質及價格相宜嘅住房。另外,之前喺呢個欄提過嘅天譽青創社區,除咗一系列為創客而設嘅工作設施,更向居於社區內嘅居民提供各種生活服務,引入穩定收入。加上公司好多樓盤選址發展潛力較佳嘅二線城市,樓控影響相對細而購買力不弱,所以二○一八年合同銷售超出預期亦破咗公司紀錄。

內地青年創業已成潮流,天譽青創社區點樣幫助青年「安居創業」?首先,對於初創企業,自己可以唔出糧,但租金往往係最重負擔,共享工作間可以減輕固定成本,亦可助初創拓展網絡。公司一七年於旗下廣州天譽花園商業大樓開設首個約二千平方米嘅共享工作空間,作為試點,而第二個工作間亦已於一八年進駐南寧天譽花園。雖然呢項業務起步短短兩年,但一八年共享工作空間連同相關物業出租率達到七成九,提供穩定服務收入八百四十萬元(人民幣,下同),成績唔錯。下一步,公司目標將共享工作間帶到廣州、南寧、重慶及徐州六個青創社區(已竣工或在建中),社區內一萬四千個住客都係潛在客仔。

安居方面,天譽從生活多種設施及服務入手。其中喺一八年啟動營運醫院嘅計劃,既服務居民,亦能為社區增值。新醫院項目位於南寧三個項目附近,可以為近三十萬人提供醫療服務,同時將作為青創社區醫療領域嘅培訓基地,一舉多得。醫院預計於二○年竣工,首期營運將開放三百張病床。

除醫療護理,公司亦積極喺餐飲、娛樂和教育等領域,尋求與其他營運商合作,並繼續同惠普合作,為社區帶來數據通訊解決方案,打造智慧生活及工作環境,提高競爭力,爭取成為中國青創社區市場龍頭。

睇返公司一八年業績,在銷售創新高之下,公司營業額六十二億元,升五成一,應佔純利七點五億元,增近三成七。全年合同銷售額逾九十三億元,較原來銷售目標八十億元高出一成七。上年底項目組合總建築面積逾二千五百萬平方米,有足夠發展儲備。物業銷售毛利率亦由一七年嘅百分之二十一上升至百分之三十,除咗因為年內交付物業(南寧天譽東盟創客城及洲頭咀項目)售價普遍上升,相信亦係品牌之功。

天譽置業集團副總裁張蓮順(Julia)(右)與陸叔攝於內房股頒獎禮上。