劉心悠同Stephy（鄧麗欣）係唔少人心目中嘅女神，當然唔係只局限於九龍啦！大題嘅「九龍」，係兩位女神參演嘅新戲《九龍不敗》中，男主角張晉所飾演嘅角色，同地域界限絕對無關。

一戲集兩大女神，又有名導陳果炮製連場動作，未上映已充滿話題性，所以今次「Paco巨星飯堂」，我就邀請兩位女神，去到位於北角嘅「喜之次」，品嘗特色日本料理，細說二人嘅新作同埋新搞作。

喺即將上映嘅電影《九龍不敗》中，心悠同Stephy分別飾演「九龍」（張晉飾）兩位重要嘅女主角，兩位女神嘅演技又有機會發揮。

大讚張晉

唔講唔知，今次係兩位女神同導演陳果、同男主角張晉嘅首度合作。心悠表示：「我喺呢部戲飾演一個富二代中醫，晉哥哥係我嘅病人，我同佢、同導演都係第一次合作，平時睇晉哥哥啲戲，佢都係好Cool咁打，但其實佢真人好親切、好有禮貌同好nice。佢成日都搞Gag，但我要停頓幾秒，先知佢原來係講緊笑，都好有幽默感。

「導演就係好爽嘅人，佢會好直接咁話我知，佢喺某一場戲想我點做、佢要啲乜嘢，所以成個拍攝過程都好smooth。」

Stephy就話：「我好贊成心悠所講，睇晉哥嘅作品，我都係覺得佢好Cool、好Chok，但其實佢好識照顧人，係一個暖男嚟嘅。「導演就係一個好特別嘅導演，佢喺拍之前已經諗好晒要啲咩，然後又會好直接、好清晰咁同我哋講，引導性好強。」

我帶兩位女神，去到位於北角嘅「喜之次」，品嘗特色日本料理，細說二人嘅新作同埋新搞作。

雖然張晉喺作品中經常展現Cool樣，又喺新作中大戰巴西格鬥王Anderson Silva（圖），但兩位女神都話，阿晉其實係暖男典範，真係人不可以貌相。

電影仲係名導陳果（右二）首次拍攝嘅動作片，有阿晉（右一）同女將陳鈺芸瞓身演出，質素絕對有保證。

赤血引刺身（$1,600）屬活魚刺身，入口鮮甜。

喜之之鮨盛合（$880），為廚師發辦嘅十款壽司，日日新鮮。

黑毛和牛配北海道馬糞海膽（$580），兩者味道融合，營造出更有性格嘅層次感。

各有「動作」

雖然話動作場面有阿晉包辦，但兩位女神都會有少量「分擔」。Stephy話：「我最大嘅動作場面，係着住套婚紗跑步，哈哈！認真嘅係，我同戲中嘅女警連環殺手，都有少少搏鬥，不過只係營造氣氛，雖然我未知拍出嚟嘅效果，有冇我拍嘅時候咁驚嚇，但拍嗰陣我真係有啲驚o架。」

心悠就話：「打鬥就未輪到我，我負責嘅只係揸靚車同揸快車，兩者嘅難度，對我嚟講已經好高o架嘞！

「導演俾咗架Porsche我揸，因為我嘅角色係富二代吖嘛，佢仲叫我放膽去揸快啲，但係我好驚會刮花架車，結果真係刮花咗，到o依家我仲好記得，睇住導演好心痛咁摸架車花咗嗰度。」

成功轉型成演技派嘅Stephy，不停挑戰自己，演繹不同類型嘅角色。

雖然電影為動作片種，但有高手阿晉在陣，Stephy笑稱喺戲中最大嘅動作場面，就係身穿婚紗於月台上奔走。

心悠所飾嘅富二代中醫，為阿晉嘅心靈支柱。

墨之黃身燒（$180），爽口香脆，最啱佐酒。

極上牡丹蝦百合沙律（$180），相當開胃。

操Fit必備

我帶兩位女神品嘗日本料理，原來正中Stephy口味，「近幾年我都只食白肉，所以日本菜係我嘅首選。而且我覺得女仔要補充多啲蛋白質，令肌肉有足夠嘅力量，所以食多啲魚同雞就最啱。」

心悠就表示：「之前我有一段時間食素，最近因為要練大隻啲，所以就食番肉。不過我發現，最有效係牛油果，有人話牛油果好肥，又好多油，所以好少人keep fit會食，但其實牛油果蘊含嘅油份，全部都係好油，即係我哋身體需要嘅油，o依家我每日都食一個o架。」

除咗飲食，心悠嘅跑手形象，甚為深入民心，早前佢仲遠赴北極，參加半馬賽事。「我睇唔到北極熊，但係睇到北極光補番數，哈哈！雖然我去到當地嗰陣，已經係off season，但好好彩地睇到少少（北極光）。

「而當地嘅飲食好得意，間間餐廳都只係賣三文魚，全部都係smoked，我喺嗰度日日食，返到嚟有一段時間，都唔係好想再見到三文魚。」

 

早已係圈中知名嘅「跑友」，心悠早前仲遠赴北極跑馬拉松，挑戰人體極限。

除咗連場動作，實力派如林雪、吳岱融嘅參演，令電影更有睇頭。

 

喜之次釜飯（$1,480），原條喜之次配上海膽、三文魚子、帆立貝及黑松露等配料，賣相同味道一樣吸引。

鐵板真鯛伴柚子醬（$380），帶酸味嘅醬汁配上真鯛，最啱初夏時節。

鬼之唐揚（$380），皮薄肉juicy。

喜之次
地址：北角北角邨里1號北角匯5號501號舖
電話：23611700