黃子雄揀女友要貼地

五十歲、喺劇集中經常做富家子弟嘅黃子雄，喺現實中真係一個有錢人。佢屋企係出版商，身家十分豐厚；加上，喺英國名牌大學畢業，絕對係筍盤。前年，佢同拍咗八年拖嘅夏竹欣分手，即刻令唔少港女，兩眼發光。

不過，黃子雄話享受單身，同埋唔鍾意倚賴男人嘅港女，仲要經濟獨立。佢同東姑講，雖然佢有車有樓，但最愛搭渡海小輪、巴士、港鐵，生活十分貼地，佢話：「一般香港女仔都期待找金龜婿，我唔係嗰種人⋯⋯港女絕對唔會欣賞我，唔會揀我，唔會考慮我，之前同夏小姐，我哋經常一齊坐巴士，冇問題呀。」

即使分咗手，黃子雄生活依然照舊，鍾意搭公共交通工具。前排，東姑喺九龍城就見到佢一支公等小巴，為怕悶，佢就一面聽歌一面等。當日，室外氣溫成三十幾度，有私家車都唔揸，佢寧願等小巴等到汗流浹背，都冇所謂，唔怪之得，一般嘅港女唔揀佢嘞。

出面天時暑熱，一支公喺度等小巴嘅黃子雄，即使貴為富家子，但卻鍾意過貼地生活。

黃子雄同夏竹欣雖然都鍾意過貼地嘅生活，但可惜拍咗八年拖後，最終都係分手收場。