為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2019 年 06 月 16 日

羅鈞滿退股甜品店升呢「男一」

之前負聞不斷嘅羅鈞滿(Moon),網民為佢創作咗一句經典潮語「做人別太羅鈞滿」。意指做人千祈唔好學佢,唔好一朝得志,就意氣風發。數到佢一連串嘅負面新聞,包括:醉駕、偷食、韓國夜店鬧事,鑊鑊新鮮、鑊鑊甘。

最終,阿Moon喺兩年前同無綫提前解約,以為佢嘅演藝事業,應該亦從此玩完。點知,佢鬥志頑強,不單只冇放棄幕前工作,仲嘗試返內地發展、接演登台騷、做埋司儀,去年仲學做生意,投資六位數同朋友合股,喺油麻地開咗間甜品店。雖然,甜品店僅開業大半年,但佢就因為同生意拍檔,喺經營理念上有分歧而退股。其實,佢都曾經努力過,開業期間,東姑仲經常見佢呢個老闆仔,親自落舖打點,由廚房做到樓面,包括入廚房製作甜品、特飲,以及捧餐、招呼客人,一腳踢。話晒佢係唔少人認得嘅藝人,但都唔介意拋頭露面,呢種自強不息嘅打不死精神,已經值得畀個讚。

東姑仲聽聞,佢退股甜品店之後,轉移專注後期製作公司呢盤生意上面,成績都唔錯。另外,佢最近亦有份參與兩部內地電影,其中一部網絡電影,仲「升呢」做埋「男一」添,真係守得雲開,希望佢好好珍惜嘞。

喺退股甜品店之前,東姑經常見到身為老闆嘅阿Moon,親身落場到舖頭幫手執頭執尾,非常之落力。

 

舖頭主打西式甜品,而阿Moon對新鮮出爐嘅泡芙品質,睇嚟仲好緊張。

 

佢喺廚房炮製甜品時,表現得駕輕就熟,就好似熟手技工一樣。

 

身為老闆嘅佢,毫無架子,仲周不時跟夥計有傾有講,大家打成一片。

 

雖然身為藝人大把人識,有頭有面,但佢唔介意親自捧餐上菜,連樓面都做埋。