郭晉安拍到伸晒脷

無綫播出嘅新劇《白色強人》，以醫療做題材，講一間醫院嘅權力鬥爭，同埋一班身穿白袍醫生嘅故事。聽戲軌都聽得出，套劇既冇槍戰動作，又冇特技或懸疑嘅場面，亦唔似柴娃娃搞笑、催淚嗰啲肥皂劇，而係戲味十足嘅文戲多。難怪早前呢部劇拍攝期間，東姑去到現場探過班，都發現兩大男主角馬國明（馬明）、郭晉安（安仔），通常拍嘅場口都係行行企企、食飯、傾偈呢幾味，好唔好睇，真係好靠編劇同演員嘅功力。

之不過，亦可能因為文戲多，東姑早前去到《白》劇喺沙田文化博物館嘅拍攝現場，就發現平時「天然呆」出晒名嘅馬明，呆得特別交關，非但跟同場對手譚偉權零交流，鏡頭以外更似靈魂出竅咁，經常企定定喺度呆若木雞。至於，同場地拍攝嘅「視帝」安仔，亦唔好得幾多，一個人拍攝一場落電梯嘅獨腳戲時，來來回回、又上又落，搞到佢都拍到奄奄悶悶，仲伸晒脷出嚟，喺度唞大氣，感覺佢都拍到唔耐煩咁嘅樣。

現場所見，惟有「一定有陰謀」嘅鄭子誠，比較識自得其樂，全場以佢笑容最多，未埋位前就同啲幕後手足講吓笑，埋位時又表演跳脫，同姜大衛輕鬆排練走位，同兩大小生拍時呆呆滯滯嘅樣，簡直相映成趣啦！

拍獨腳戲都一樣拍到奄悶嘅安仔，仲伸脷唞大氣，睇嚟都拍到有啲唔耐煩喇！

落完樓梯，又上番樓梯，安仔為場戲來來回回上落好幾次。

一場戲拍足幾個take，拍攝幾個唔同角度，喺轉景轉位時，安仔先有得唞吓。

喺《白》劇中飾演醫生嘅馬明，拍文戲拍到呆呆滯滯，招牌「天然呆」個樣又出晒嚟。

「一定有陰謀」嘅鄭子誠，劇中飾演衞生局局長，場戲講佢傾住電話扮大忙人。

戲外，鄭子誠同啲場務、道具手足有講有笑，態度輕鬆。

鄭子誠跟劇中飾演醫院院長嘅姜大衛，有場非常嚴肅嘅文戲。