為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2019 年 06 月 13 日

搜出攻擊性武器 立會限議助出入嚴防周三爆大鑊

反修訂《逃犯條例》觸發數十萬人上街,遊行後更有示威者喺政府總部及龍和道外爆發流血衝突,似乎係提早為下一輪衝擊議會測試立法會一帶嘅布防實力。有激進示威者講到明,睇見政府拒絕撤回修例,維持原判喺本周三(十二號)在立法會大會恢復二讀辯論《逃犯條例》,怒吼係一場官逼民反嘅抗爭,已在網上號召支持者將抗爭升級,下輪戰場直指立法會大會,預料將動員更多人包圍議會!

逾百人日前上演一幕衝擊立會後,多個建制派政黨包括經民聯、民建聯、自由黨、工聯會及新民黨都先後發聲明,表明繼續支持修例。身兼行會成員嘅立法會議員張國鈞話,預料周三大會當日,議會內外嘅情況將變得更嚴峻,「建制派將沉着應戰,支持政府,未有任何跳票嘅情況。」據知九號晚混亂過後,立法會保安搜到大批攻擊性武器,嚇咗一跳,為免有人拎武器埋身威脅議員,已於本周一(十號)實施禁止所有議助出入議事廳所在嘅一樓及二樓層,避免有人借議助身份混水摸魚搞事。

議會大戰如箭在弦,泛民議員已揚言搏老命玩鋪勁,建制派議員都紮行馬迎戰,有建制議員透露,初步同意為防流會,會採取「九三共識」,即係坐定定開會「九個字」(四十五分鐘),然後步出議事廳氣「三個字」(十五分)鐘;呢個時候,泛民一定使出打鐘點人數,建制議員會趁打鐘呢十五分鐘上廁所、食嘢醫肚等,然後步回議事廳,展開下一個「九三共識」,如是者不斷循環!

此外,佢哋預咗審議期間泛民將使出唇槍舌劍,為免正中下懷被拖延時間,建制派同意有關規程問題,就交由大會主席梁君彥處理,唔會插嘴。

除咗衝擊議會,泛民另一條戰線係提出二百五十幾項修正案,拖延審議時間,呢招真係好考主席梁君彥嘅剪布智慧。佢回應傳媒話,正逐一處理,暫時未決定會否限制議員嘅發言時間。立法會議員謝偉俊話,預料主席使出將類近修訂以合併方式處理,然後一併作「合併辯論」嘅機會甚大,「咁就可以盡量減省審議時間,加快通過機會!」

逾百名激進示威者包圍立法會一夜與警方對峙,似為下一輪衝擊議會作預演。

 

梁君彥展示喺立會示威區檢獲自製削尖長矛等武器。

 

有示威人士疑拎着證件混入立會加入衝擊行列,保安部即時收緊議助出入議事廳樓層嘅權限。