為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2019 年 06 月 15 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

商.對百人

二○一六年受電視台邀請主持訪談節目《商.對論》,不經不覺快將播出第一百集,多謝觀眾一直支持。節目開始時只打算拍一季,由十一月開始每周在無綫財經資訊台(J5)播出。出街後收視反應唔錯就一路續拍,呢個星期會播出第一百集。同電台節目唔同,訪問同股票投資冇直接關係,而係透過傾談了解公司決策背後嘅理念。

節目內我同超過百位商界及企管精英對話,佢哋來自不同行業、新舊經濟。最初我以為會限於談論行業、市場趨勢、管理心得,但第一集訪問正官庄第二代掌舵人趙亨泰,佢一開始就講自己差啲冇得讀大學,幸好本身目不識丁嘅媽媽堅持要供佢上大學,所以佢公開喺節目講「我愛妳,媽咪」。後來亦有夫妻檔、父母子女、兄弟姊妹、叔姪等上陣,佢哋言語之間都流露出默契和信任,仲有欣賞感恩之情。無論創業守家業、管理企業,條路確實充滿挑戰,家人永遠係最強大後盾,我亦開始多啲從嘉賓個人經歷出發,看如何塑造性格和價值觀,從而造就企業成功。

我亦感激多位商界領袖百忙抽空接受訪問,好似極少做呢類訪談嘅澳博常務董事兼行政總監梁安琪(Angela),身兼多職都抽時間上嚟分享。Angela本身係一位舞蹈員,初入行並無商界經驗,由小職員到財務總監一直到現職,一直以「勤力」作為座右銘。佢亦係公司股東及福利諮詢會主席,對於持份者各有立場意見,有時甚至出現衝突,Angela分享小小心得:要專心投入每一個角色,以公司前景考慮和以雙贏為基礎處理事務避免衝突。

另外我好記得第二集訪問時任港鐵主席兼大學校友馬時亨(Fred),一路做訪問一路搭地鐵去香港大學站。七○年代我讀大學時返學真係「長途跋涉」,Fred同我一樣放咗學會去教書,由港大過去佐敦要一個半至兩個鐘車、船程。嗰日係我第一次去香港大學站,睇見站內掛咗一張張舊照,勾起不少回憶。

第一百集會訪問AXA安盛首席策略總監尹玄慧;AXA總公司一八一七年創立,至今超過二百年,其他訪問過嘅百年企業仲有余仁生、Miele、昌興等,另外亦有本地老品牌如白花油、黃道益、周大福、太子珠寶等。

最令我得益嘅係,百集之內往往網羅同一行業嘅競爭者,好似金融財務有花旗、滙豐保險、亞洲財務、BCT銀聯、WeLab等;支付系統有八達通、Alipay、香港電訊支付、TNG;網上貨運有GoGoVan、LaLaMove;飲食有富豪、龍皇、翠華;地產代理包括中原、利嘉閣、翡翠島;旅遊有翠明、縱橫遊、康泰、美麗華旅遊、專業旅運、Trip.com;更有大企業機構如金銀業貿業場、領展、港鐵等。有機會從不同角度了解一個行業嘅競爭情況和發展前景,對我平日嘅工作好有幫助。

兩年多以來,一百集嘅拍攝,數不盡嘅開心事,當然亦有緊張場面,好似訪問BCT銀聯當日我失咗聲,用盡一切辦法勉強細細聲上陣掩蓋沙啞。一百集眨眼過去,其實仲有好多公司我希望約談,如果有機會期待未來二百以至三百集再次回顧!

陸叔訪問馬時亨,一齊搭港鐵返港大。