為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2019 年 06 月 09 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

麵尊vs麵神

車仔麵係代表香港嘅美食之一,夠晒港式,但講到質素,就有啲良莠不齊,但最近我就尋找到銅鑼灣一個新「麵場」,而老闆之一仲係我嘅戰友恭碩良(Jun)。

即將於8月開Show嘅阿Jun,一直都係我交流音樂、電影嘅buddy,o依家仲可以同佢傾多瓣。今次「Paco巨星飯堂」,愛麵食而有「麵神」之稱嘅我,就去到阿Jun嘅主場「麵尊」,同佢慢慢傾!

由音樂人到演員,阿Jun近期仲踩入飲食界,變身「麵尊」。佢表示自己一向都係車仔麵「忠粉」,所以十分享受呢個新嘅「身份」。

 

借醬行善

餐廳本於上環起家,已有九年歷史,銅鑼灣新店係阿Jun同店主聯營嘅結晶。「我好鍾意食車仔麵,但亦因而失望過好多次。呢間餐廳喺上環嘅原舖,同我以前嘅Studio、物理治療師只係隔一條街,所以我成日經過,終於有一次我真係試咗,因為有太多人排隊,我只係叫咗外賣,但係一試就愛上咗。

「我係一個唔會特別點內臟嚟食嘅人,但係我好鍾意食呢度嘅豬大腸,除咗洗得好乾淨,入口仲有少少甘甜,喺第二度食唔到。」

除咗深情推介,老闆阿Jun仲以兩款秘製特色醬行善。「之前我都有賣麻辣醬,為救狗之家籌款。因為我屋企嗰兩隻狗狗,都係透過呢個慈善團體領養嘅,所以我就想捐款俾佢哋,去救多啲狗狗。包裝上嘅Logo,就係我其中一隻狗狗Oliver。

「而兩款醬料,一款係麻辣,另一款係咖喱。做麻辣醬係因為我係一個無辣不歡嘅人,無論食咩我都要加啲辣醬,呢個係我提升食物味道嘅方式,加咗辣真係好食好多!」

我愛試各式麵食,一向有「麵神」之稱,今次去到阿Jun位於銅鑼灣嘅主場「麵尊」,除咗同佢交流音樂經,就梗係要試吓餐廳嘅麵食!

 

餐廳有包裝精美嘅麻辣醬同咖喱醬出售(各售$80),以百年老店嘅香料炮製,增加味覺享受。而每售出一樽,當中有$20會捐予救狗之家(Hong Kong Dog Rescue),作慈善用途,甚有意義。

 

 

 

大尊($42)以豬紅、蘿蔔、咖喱魚蛋、紅腸、豬皮及菜作配料,相當豐富。餐廳以熬製最少五小時嘅豬骨湯作湯底,而且設免費加湯服務,夠晒貼心。

 

淨雞翼尖($20)煮得入味,令人停唔到口。

 

一年一Show

多咗「麵尊」身份,但阿Jun並冇忘記老本行,仲將會於8月,喺麥花臣場館舉行兩場《Right Here Right Now Live 2019》演唱會,繼續以歌會知音。

「今年係我出第一隻碟《Here & Now》嘅廿周年,係值得紀念嘅一年。之前我每年都有開Show,但係就鍾意將自己啲歌,改到天花龍鳳、面目全非,今次我就要跟番每首歌最original嘅版本。我好多時睇concert,見到啲觀眾一聽到金曲嘅Intro,個歌手都未開始唱都已經High晒,作為一個歌手,我都想享受呢一個moment。」

為咗還原,阿Jun一早着手籌備。「我第一次請咗一位音樂顧問,就係Carl王雙駿,好多嘢我都會問佢意見,亦係佢介紹今次我個Show嘅監製細So俾我。」

為咗原汁原味喺舞台上呈現自己金曲嘅原版,阿Jun特別誠邀Supper Moment嘅音響工程師,為佢還原每一條聲軌,誠意十足。

 

以由下而上嘅角度拍攝演唱會海報,有新意同時又表現到阿Jun嘅心意,相信樂迷對佢8月舉行嘅兩場演唱會,更有期待。

 

細尊($40)嘅配料為豬紅、蘿蔔、咖喱魚蛋、紅腸及豬皮,豬紅爽口,一試難忘。

 

淨豬頸肉($30)軟腍香滑,值得一試。

新曲X2

為演唱會積極籌備之餘,阿Jun同時製作咗兩首新歌,一慰樂迷。「第一首〈Kam Julienne〉,係廣東話『監粗嚟』嘅意思,寫呢首歌係因為我從好多朋友口中,學識咗好多潮語,亦喺網上睇到唔少,於是就有靈感去做,係一首好得意嘅歌。」

至於另外一首歌,阿Jun就鮮有地搵咗一位拍檔。「其實係公司一位同事,同我心有靈犀地諗起搵Yoyo(岑寧兒)合作,而佢亦都好爽快咁應承咗,就有咗新歌〈5:59pm〉嘅班底。

「呢首歌嘅歌名,大概都交代到歌曲嘅主題,就係喺下晝五點五十九分,個個打工仔都想快啲到六點,快啲收工走人。所以歌詞有一句係『放我走 六點鐘請鬆綁』,我諗冇人想俾office困住嘅!」

阿Jun喺新曲〈5:59pm〉中,同岑寧兒首度合唱,新MV同歌曲同步推出,道盡打工仔心聲。

 

 

 

餐廳嘅多款車仔麵配料都屬自家秘製,價錢由$10起,配上特製醬料,更添風味。

 

 

 

淨炸魚皮($20)係另一個港式經典,香脆可口。

 

麵尊 Min Jun
地址:銅鑼灣登龍街18號V Point地下5號舖
電話:23263062