趙希洛接地氣坐門口

有圈中富家女之稱嘅趙希洛（Candice），雖然父母身家億億聲，但一向為人相當低調，生活亦相當貼地。

早前，東姑就喺九龍城遇上Candice。當時，佢正喺度幫襯一間由中藥材舖改造而成嘅新派café。雖然佢係藝人有唔少街坊認識，但完全冇自覺高人一等；嗰日，佢仲坐喺café門外嘅位置，一邊飲住杯凍咖啡，一邊放住部平板電腦喺度睇短片，感覺相當悠閒寫意，好有時下嘅文青feel。

東姑所見，佢同啲餐廳職員都有傾下偈，似乎係幫襯開嘅熟客仔，而臨走之前，佢仲幫襯café買咗件該店出品嘅文青tee，真係撐小店撐到底，亦似佢為人接地氣，無論衣食住行都極之平民化嘅。

坐喺café門外面嘅趙希洛，一邊飲咖啡，一邊揸住平板睇短片自娛，自得其樂。

同café職員有傾有講之外，佢仲幫襯買件該店出品嘅T恤，非常支持小店。

呢間café係由舊式藥材舖改造而成，係文青打卡嘅熱點，睇嚟趙希洛都鍾意行文青路綫。