為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 理財  > 投資攻略 2010 年 10 月 12 日

施永青王文彥破冰飯局

商場上沒有永遠的朋友,亦沒有永遠的敵人,只有共同的利益,就好似中原地產兩位老闆施永青跟王文彥,昔日並肩創立中原,及後因經營理念不同,王文彥憤而退出董事局,並另起爐灶,實行與中原打對台。

王文彥同老施兩人係中學同學,七八年攜手創立中原,昔日的生意拍檔不歡而散,王文彥離開中原後喺九二年自立門戶,先後創立長安地產及怡居地產。王文彥經常投訴,話中原年年賺大錢,自己雖揸住公司四成半股份,但就冇得分,皆因老施將所賺嘅錢派晒畀啲董事及管理層,餘下先分畀股東。老施自己係管理層一員,自然唔介意,相反王文彥只係股東,分到最後所剩無幾,難怪佢好唔忿氣。

多年來兩人互相攻擊,王文彥抨擊老施把持中原管理層,為自己謀取最大利益,犧牲在野股東權利,施永青則直斥王文彥喺中原背後指指點點。三年前中原有高層因回佣而被拘控,王文彥瘋狂發炮,直言搞到此地步,絕對係施永青「無為而治」種下嘅禍根。

不過,一言知道,王文彥近年與老施關係開始改善,上周王文彥仲相約老施飯局,連一眾中原高管都請埋,筵開三席,出席者包括有集團總裁黎明楷、住宅部董事總經理陳永傑、港澳區行政總裁黃偉雄等,陣容都幾鼎盛。

呢次破冰飯局係廿年首次,以節儉出名嘅王文彥點解願意大破慳囊請咁多人食飯,據聞係呢幾年老施分畀股東嘅錢唔似過去咁手緊;而近年中原業績又屢創新高,王文彥為當中受惠者,特別係美聯(1200)早前公布中期業績唔到兩億六,王文彥見中原盈利高出美記一倍有多也大為驚訝,決定慰勞一吓班舊同事。

鍾錦江原來揸住七、八個山翠苑單位,係居屋小炒王。

中原成績咁好,難怪王文彥(左)肯請施永青(右)同班夥計食飯。

《新報》副社長係居屋小炒王

近期傳媒界風起雲湧,呢邊廂話新世界(0017)董事總經理鄭家純私人收購新報,那邊又傳出恒地(0012)主席李兆基個仔李家傑買無綫電視,跟住又話小小超李澤楷會將now TV分拆上市。雖然幾日前鄭家純喺公司業績會上唔肯正面回應入股傳媒,但新報人事已起大變化,曾於十年前出任新報正副社長嘅馮兆榮同鍾錦江回巢,一言知道,新任副社長嘅鍾錦江,原來係居屋小炒王。

鍾錦江近兩、三年夥拍地產炒家陳清白,先後喺柴灣山翠苑買買賣賣十多個單位。一言嘅老友經紀通天話,現時鍾錦江仍持有約七至八伙山翠苑,平均入貨價只係百五到百六萬,依家部分以二百一十萬放售,若賣得出,平均每間有兩至三成升幅。

施永青(右)、王文彥(左)一起創立中原,可惜因經營理念南轅北轍,終要分道揚鑣。

縉庭山車位不足一月升值逾倍

講開炒樓,自從港九新界啲樓都被熱炒,不論大小樓宇,價格都有唔少升幅,有見及此,炒家已經將戰場殺到車位。發展商見車位有價,趁勢將旗下樓盤車位出售,嘉里建設(0683)早前推出剛入伙嘅荃灣縉庭山車位,但就引起業主不滿。

位於荃灣工業區的縉庭山,共有五百四十八伙,偏偏車位只有八十個,比例約莫七比一。早前嘉里以抽籤方式推出四十八個車位,每個售價由四十二萬到四十六萬,有過百業主爭,由於僧多粥少,結果有新買家不足一個月已將車位以六十多萬轉售。呢排市場只有兩個車位放盤,叫價更高達八十萬,短短三個月,價格炒高一倍。

不少縉庭山業主投訢,話賣咗嗰四十八個車位,只有十多個有車泊,車位落晒喺炒家手,出現「有位無車泊」。

縉庭山車位炒高足足一倍,難怪業主唔高興。

神州資源主席猛料

原本從事展覽業務嘅神州資源(0223),舊年因為買咗個黑龍江煤礦而搞到官非纏身,仲停咗年幾牌,到依家都未復牌。仲以為佢哋見過鬼就怕黑,唔會再涉足煤礦業;點知行政總裁趙瑞強話,近排公司已經開始物色收購機會,仲話呢行大有作為。

點解咁有信心,原來佢哋新任主席耿瑩大有來頭,七十歲嘅耿瑩除咗有豐富嘅勘探礦山資源經驗外,仲有廣闊政經人脈關係。聽講佢老爸好猛料,就係一九八一至八二年期間,任國防部長嘅耿飆,除咗做過國防部長,耿飆曾出任外交部副部長、中央軍委秘書長同全國人大常委會副委員長。耿瑩早前仲話,當年父親率領代表團訪問美國,係第一批參觀航空母艦嘅解放軍。

神州資源主席個老爹原來係中共前國防部長耿飆(圖)。