為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2019 年 06 月 06 日

鄉議局副主席選情罕見激烈 林奕權大熱倒灶有玄機

鄉議局選局上周六揭盅,劉業強喺無對手下連任主席,成功保住江山,不過兩個副主席位之爭,賽果就出人意表。被視為前副主席張學明頂頭接班人嘅大埔鄉委會主席林奕權,最終以一票之差輸畀一直不算被睇好嘅沙田鄉委會主席莫錦貴。林奕權所屬嘅「學明派」臨門輸個馬鼻,有傳係因為派內部分鄉紳「各有諗法」,未完全「跟大隊」所致。

有鄉事派消息人士話,林奕權月前火速接張學明棒做大埔鄉委會主席後,唔少人認定佢可以再下一城,派內亦「吹雞」力撐林上位。不過到真正投票一刻,部分鄉紳就「按自己意願」投票,即係話張學明嘅支持者,並無「全數過戶」畀林奕權。

有傳咁係因為「學明派」內有部分鄉紳「扭計」,不滿鄉民利益未受重視有關,有鄉紳直言:「每次選舉我哋一定聽話為建制派出力『抬轎』,但當我哋嘅丁權利益或者土地發展受影響時,就好少見有人發聲幫我哋爭取,所以今次要諗清楚先選,唔再係人哋叫投邊個就投邊個。」

事實上,鄉議局自從年前由人稱「發仔」嘅劉業強接棒後,一直盛傳局內分裂成「太子派」及「學明派」,兩派勢均力敵。當張學明年前宣布唔再尋求連任,為延續影響力,一直有意力棒情如沙煲兄弟嘅鄉事派海外僑領「牛哥」林道明嘅囝囝林奕權上位,可惜部署棋差一着,以一票飲恨。

不過講到底,林奕權以新丁姿態參選,氣勢直逼元老莫錦貴,下屆佢捲土重來,隨時有力「翻盤」。至於新當選副主席嘅莫錦貴,佢來頭都唔嘢少,係沙田「地膽」,在鄉事派打拚多年結下廣闊人脈,有傳佢同中方關係友好,深得器重,佢事後都話「無諗過競爭會咁激烈」。

鄉議局選舉以往講求和諧,人選都係「內部傾掂數」,好少見鬥得咁激。今次以「大埔約」出現三人爭一個位。林奕權最後拎到五十七票,鄉事派元老莫錦貴取得五十八票險勝;另一名參選人李耀斌則有二十一票。至於「南約」方面,盛傳連任有暗湧嘅副主席林偉強,以七十七票高票連任,拋離對手黃文漢所得嘅十七票。

鄉議局換屆選舉,過去大多數都是事先協議好人選自動當選,甚少像今屆般真係要投票、點票。

 

賽前被視為大熱嘅林奕權,以一票之差無緣問鼎副主席之位。

 

劉業強(中)「冧莊」續掌鄉議局,與出爐副主席莫錦貴(右)及連任成功嘅林偉強(左)當選後齊齊合照。