為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2019 年 06 月 06 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

殯葬業的文化與創新

之前喺呢個欄寫過生前契約和其他殯葬服務,有朋友奇怪我會討論呢個話題,其實我哋為自己同下一代(甚至兩代)作出種種安排,無非為安享人生,因此到咗終站點解唔及早籌劃?美國政治家富蘭克林話人一生冇嘢係必然嘅,除咗死亡和交稅。呢句話可以當係講笑,但亦不無道理,而我認識福壽園(1448)管理層多年,成日聽佢哋講死亡當然無可避免,但殯葬服務就有不同選擇,因為各種儀式場地都承載對先人嘅記憶和情感,而公司嘅理念亦係延續傳統文化。

福壽園(1448)係內地最大殯葬服務商,產業鏈包括公墓、殯儀、殯葬設備、生前契約、規劃設計、生命教育等。公司要保持行業龍頭地位,除咗要適時併購以擴大業務範圍、進入新市場之外,亦要同其他行業一樣持續創新。

好似殯葬業一向畀人感覺係黑白色,為行業染綠亦係其中一項創新。我最近到江西南昌參觀公司同當地政府合作併購嘅梅嶺世紀園,就見到除藝術墓及平板墓之外仲有環保節地墓,每個位置四分一平方米。另外,掃墓燃燒祭品亦帶來污染,呢個墓園就推行低碳祭掃,提倡以紀念代替祭祀。如果喺香港實行,相信每年清明山火事故都可以減少。

公司亦認為殯葬係社會責任事業。上年九月民政部發布意見稿,提出建立基本殯葬公共服務制度,五項基本服務由政府定價管理,免費提供畀有困難嘅群眾。公司已經同南昌市民政局簽訂協議,免費提供節地墓和殯葬服務畀有需要先人,並為弱勢群體準備生前契約。因此相信有關修訂對公司影響不大,反而能整頓行業,改善良莠不齊現象。

公司講番併購梅嶺世紀園嘅因由,原來都係從公益角度出發。呢個墓園在一九九八年由台商投資興建,二○○一年正式銷售骨灰安葬位及墓穴,當時以高回報及保證回購宣傳手法吸引到大批市民購買,到○五年因為資金鏈斷裂,兌現唔到承諾引起公憤,當地政府為解決事件,與福壽園成立合資公司,接管項目並解決退款問題,平息風波。墓園係長期事業,信用好重要,所以公司收購梅嶺世紀園,除咗擴展市場仲賺到良好聲譽。目前園區共有兩萬四千多個墓位同埋兩萬多格位。

福壽園上年進入貴州、內蒙古及湖北新市場,截至一八年底,業務覆蓋十五省三十幾個城市,營運二十座墓園及二十二間殯儀設施。上年收入十六億五千萬元(人民幣,下同),增近一成二,純利近四億九千萬,增一成七。墓園服務為核心業務,收益佔總收益八成六,即使上年經濟放緩下,墓穴嘅平均銷售單價亦升百分之七點五。同時年內簽咗二千四百多份生前契約,按年增逾一倍。

喺老齡化、城鎮化、人均可支配收入提高之下,殯葬服務需求將持續增加。公司更在今年一月,參與發起成立殯葬產業併購基金,相信有助繼續擴展及推動更多優質項目落地。

福壽園在江西南昌的梅嶺世紀園。