講演講唱，擁有靚聲又手執兩個金像獎嘅王菀之（Ivana），可謂雙棲贏家！最近佢親力親為，統籌百老匯音樂喜劇《First Date》，由組班、改編劇本到宣傳工作，佢絕少假手於人，「孕育」心血結晶。

今次「Paco巨星飯堂」，我就請嚟Ivana，率領佢嘅幕前卡士：出爐金像獎最佳男配角袁富華（Ben）、余迪偉、鄧智堅（Eric）、吳鳳鳴（鳳Ming）及張月盈（Florence），去到位於南豐紗廠嘅「TAP The Ale Project」，品嘗特色嘅Fusion美食，大談「第一次」嘅樂事。

由Ivana（左一）領軍、「揀蟀」，以誠意打動吳鎮宇粉墨登場外，加上鳳Ming、Florence、迪偉、Eric同阿Ben（左二至右一），令百老匯音樂劇《First Date》更見吸引。

一腳踢

Ivana不嬲以靚聲喺樂壇著稱，佢今次仲作出極大嘅自我挑戰！「呢個百老匯音樂劇，係我第一次做出品人、統籌、表演者、投資者、翻譯同監製，令我好似一夜之間長大咗。我好愛舞台，我哋都知道喺香港做劇場係好艱難，但係做到就好magical。」

劇場係Ivana其中一個夢想，另一個就係同吳鎮宇大哥合作，「其實我想同鎮宇哥合作好耐，一路都唔夠膽開口問。我睇《逆流大叔》，覺得鎮宇大哥做得好有劇場feel，到我真係訂咗場地做舞台劇，第一個諗起就係佢，於是就問佢有冇興趣成就呢件事。

「佢都好快覆我，話：『哎呀！舞台劇就唔好搞我嘞！不過我想演音樂劇！』我即刻又驚又喜，我最愛音樂但都唔夠膽掂音樂劇，因為我知道要求很高，要唱跳都好，才可以做到百老匯級數嘅音樂劇。」

Ivana飲一啖水，繼續講：「但既然為咗圓夢就應該撇脫啲，我研究咗啲適合嘅劇目，搵咗貼近香港人口味嘅劇本，最後篩選咗《Once》、《Lucky Stiff》同《First Date》三個輕鬆音樂劇，鎮宇大哥話《First Date》最令人有共鳴，咁就扑鎚嘞。」

我帶六位嘉賓，去到位於南豐紗廠嘅「TAP The Ale Project」，品嘗特色嘅Fusion美食，大談《First Date》背後嘅故事。

Ivana、鎮宇哥同阿Ben（左至右）係金像獎贏家組合，放喺音樂劇上，就係一個極有新意嘅卡士，而且質素仲相當有保證添！

音樂劇將於8月30日至9月8日，於演藝學院歌劇院公演，係Ivana嘅心血結晶。

醋魚。小點（$56），啤酒包配上西班牙醃魚、甜椒醬等配料，酸酸哋相當開胃。

薯條（$52），可隨個人口味，加$20添蒜香或加$30成「黃金薯條」（即鹹蛋黃），佐酒恩物。

炸卡津雞翼配腐乳醬（$78），脆卜卜嘅雞翼配上特色腐乳醬，提升味覺質感。

Pro班底

選定劇本後，Ivana就着手其他工作，包括翻譯原著劇本。「好彩我本身鍾意睇英文書同英文劇本，第一次譯劇本都唔算好難，不過都執咗幾次，先夠膽給演員睇。睇英文版劇本嗰陣，我已幻想到咩角色由邊個演員去演。一路翻譯就會一路笑，因為諗到佢哋把聲、眼神、表情、會點樣講對白，齋幻想已經好開心。

「最難係譯做廣東話又要譯得貼地，不過我將Broadway原作嘅歌，交俾王祖藍譯中文歌詞，佢好有經驗，又keep到百老匯式大都會愛情感覺，又係香港人嘅口脗，令香港人會識笑。」

迪偉就話：「基本上我哋一出台，就唔會返入後台，要不停穿插轉換不同角色，我主要演Ivana嘅基佬朋友，俾戀愛意見佢；再有其他幻想角色，但要我又演又唱又跳兩粒幾鐘，未必及得上佢哋專業舞台劇演員咁夠氣。」

女將嘅組合集名氣與實力於一身，而且全部前期工作，都由Ivana一手包辦，為咗實現夢想，佢出足120%努力。

Ivana早已透過電視、電影演出，去發揮佢嘅喜感，佢話今次製作同演出音樂劇，係夢想成真。

為咗吸引鎮宇哥，Ivana喺挑選劇本嘅時候，已經詢問偶像嘅意見，誠意可嘉。

潤臘。誘惑（$56），啤酒包上是自家製的臘腸及潤腸醬，添上fusion氣息。

燒肉古巴佬（$48/$88），意式拖鞋包內為自製燒腩仔、甜火腿、脆豬皮等餡料，味道同層次感同樣豐富。

超新Sing

阿Ben係應屆雙料「最佳男配角」，但演音樂劇佢就自稱係初哥。「Ivana搵我做呢個musical時，我同佢講：『不如你聽吓我唱歌先啦。』本來我已練好一段歌，等佢叫我唱，點知佢WhatsApp我話：『Ben哥，歌唱指導老師話你唱到呀，你應承我啦！好唔好呀？』結果連casting都唔使。」

Eric就表示：「我哋每人都要分飾唔同角色，我其中一個角色係鎮宇哥嘅死黨，要經常提點佢；另一個角色就好似係佢嘅心魔，成日就好似天使同魔鬼咁，俾唔同嘅意見佢。我同鎮宇哥都係第一次合作，都有啲壓力o架。」

演開舞台劇嘅鳳Ming話：「我飾演Ivana家姐，都會好似天使魔鬼咁，俾好多意見佢。」

而嚟自澳門嘅Florence就話：「我本身做幕後，通常都係排舞，做幕前已好大挑戰，Ivana搵我嗰陣，我即同佢講：『你不如聽完我唱歌先決定啦！』之後我就清唱一段，錄俾佢聽。今次我飾演鎮宇哥嘅前未婚妻，入到禮堂嗰刻先話唔同得佢結婚。」

迪偉表示，劇中除咗鎮宇哥同Ivana，其他五位演員要身兼多角演出，仲笑言：「我哋五個先係主角！」

雖為應屆金馬、金像獎雙料「最佳男配角」，但阿Ben表示要嚴陣準備演出音樂劇，

羊奶杏鮑飯（$88），以山羊奶芝士煮製意大利飯，不論飯粒及杏鮑菇都吸晒精華，滋味無窮。

吐司雞（$48/$88），以厚切西多配搭介央牛油、炸雞，加上大麥麥芽糖漿，夠晒新鮮。

麵豉金寶意（$88），以燒麵豉配煙肉、秋葵等配料，跟意粉非常搭配。

TAP The Ale Project
地址：荃灣白田壩街45號南豐紗廠3樓302號舖
電話：23312621