何家勁落力掃毒

入行已經有三十幾年嘅何家勁（Kenny），九十年代憑《包青天》中飾演展昭一角，攀上咗事業嘅高峰，自此佢同展昭兩個字就不可分割，亦都因為咁，令到佢喺國內變成萬人迷，曾經有一陣子內地嘅購物膠袋都印有佢肖像。早年，何家勁就食住個勢喺內地進軍商界，大搞五穀健康食品生意，產品仲以佢影迷會個名「勁家莊」嚟命名；而擔任惠州市政協委員嘅佢，順理成章將生產廠房設喺惠州。

雖然內地工作忙碌，但何家勁每個月必定返港一兩日探阿媽。最近，佢就好興奮咁話畀東姑知，惠州市嘅禁毒協會推薦佢做禁毒大使：「要做禁毒大使，真係好難，要經過市長拍板，我絕對唔係靠關係。上個禮拜，我就幫佢哋拍咗條宣傳片，當日風和日麗，非常順利，發幾張相畀你哋分享啦！」東姑睇完即刻畀個like佢！

有「展大俠」外號嘅何家勁，正氣凜然嘅形象深入民心，做禁毒大使，最適合不過。

何家勁經常做運動，加上飲食健康，身材fit爆，着起呢套制服，特別醒神。

拍攝當日，何家勁亦有向幕後提供意見，令拍出嚟嘅效果盡善盡美。