羅力威爸爸抗癌加環保雙鬥士

現年六十八歲嘅羅力威爸爸羅樹源，原來係幾出名嘅環保鬥士。早前，羅爸爸仲發起咗一個兩日一夜嘅撐獨木舟籌款挑戰，幫環保組織綠色和平籌款，兼喚醒港人對海洋污染嘅關注，非常有心有力。

早前，東姑就睇咗羅爸爸嘅一個電視訪問，佢透露喺九六年四十四歲時，不幸患上肝癌，切除咗四分一肝臟。康復後，佢選擇提早退休，並重拾年輕時嘅興趣，重新投入划獨木舟運動，兼做教練。而佢更加喺杳無人煙嘅䃟石灣，打造咗一處世外桃源，一手一腳清理雜草、開地種樹，又用獨木舟逐件逐件，搬運一啲棄置嘅舊家具，到島上佈置，將嗰個地方，變成佢平時划獨木舟嘅中途補給站。

由於經常與海洋為伍，羅爸爸對近年海洋污染日益嚴重特別心痛，於是積極參與環保組織嘅保護海洋運動。早前，佢仲由東涌出發划獨木舟至西環，幫組織籌咗六萬蚊善款。而活動當日，咁啱就係佢兒子羅力威同雨僑結婚一周年嘅紀念日，羅力威仲親自到場撐爸爸，大讚羅爸爸毅力驚人之外，亦呼籲大家齊撐海洋添！

喺活動上面，羅力威大讚爸爸嘅毅力驚人，並同時呼籲大眾，要響應保護海洋。

六十八歲嘅羅爸爸係獨木舟高手，早前佢一個人由東涌出發，划獨木舟至西環，為環保組織籌款。

喺電視訪問節目中，羅爸爸透露自己早年曾患肝癌，切除咗四分一嘅肝臟，係一名個抗癌鬥士。

 

羅爸爸喺島上，落手落腳打造一處世外桃源，作為佢划獨木舟嘅訓練基地及補給站。

喺杳無人煙嘅島上，羅爸爸獲得島上地主嘅同意，親手種植香蕉及菠蘿，自給自足。

兒子羅力威及新抱雨僑，都非常支持羅爸爸保護海洋，仲喺社交網呼籲大家踴躍捐款。