為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2019 年 05 月 30 日

決心直闖立會大會 政府袋住「二步走方案」

政府修訂《逃犯條例》已經得到中央表態支持,好快就會直上立法會大會審議,特首林鄭更取消德國訪問坐陣香港睇實。近日政府各部門空群而出四處解畫,就係希望打好個底,爭取更多支持。

有心水清者話留意到,政府雖然否決咗好多意見,但對於「不如先易後難」、「不如提高移交門檻」等嘅聲音,雖然冇讚成,但亦都冇正面Say no。消息人士向本刊透露,政府嘅想法,係留些空間,畀議員在大會上做修訂。有重量級建制人士曾向特首獻計,叫佢袋住張「二步走方案」底牌,以防萬一。

「二步走方案」係指,政府可以分階移交逃犯,先執行涉及殺人、放火、販毒、姦淫擄掠之類最無爭議嘅嚴重罪案類別;等市民認識清楚《逃犯條例》並唔係洪水猛獸之後,下一步再考慮加入其他如賄賂、走私等罪行。

有建制派人士認為,二步走修例既可塞住泛民同外國啲滿口歪理嘅反對聲音,令一眾借今次修例喺度製造白色恐怖嘅別有用心人士無話可說,亦可以令普通市民更清楚政府只係為法治而修例。

消息人士話,不過政府唔會輕易主動打出底牌,議員修訂空間好多,其中一招就係法案提上立法會大會審議時,各政黨可以提出一啲微調修訂,只要符合政府底牌嘅大方向,例如,對於內地提出移交逃犯時,只接受處理由最高人民法院提出嘅個案,以及要求將所涉罪行必須在港可判監嘅刑期,由目前嘅三年提高至七年等,相信獲接納機會好高。

不過,對於坊間提出撤回追溯期及「港人港審」嘅建議,據知就真係難有退讓空間,而國務院港澳辦主任張曉明早前講得好清楚,只要相關犯罪行為不在內地發生,就不會被移交到內地受審,無喺內地犯事嘅港人,根本唔使擔心。

泛民在立法會議事廳外拉起橫額,向特首林鄭月娥抗議修訂《逃犯條例》。

 

中聯辦日前接見數十名港區全國人大代表及政協委員,通報中央支持特區政府依法修例。

 

商界對政府修訂《逃犯條例》有不少憂慮,保安局局長李家超(右三)逐一向各團體解說相關法案。