多年以嚟，香港人審美，不外乎「美貌與智慧並重」，隨住時代變遷，選美活動又國際化，喺呢個基準之上，外加咗唔少新條件。今次「Paco巨星飯堂」，我就請嚟即將舉行嘅「2019亞洲太平洋國際小姐選舉（香港區）」，大會嘅形象總監何紫綸（Ann），聯同兩位星級導師：張崇基同國際商務禮儀師Dr. L（梁迦傑），360。揭開審美新角度。

我帶三位嘉賓，去到位於九龍城嘅隱世小店「家．正料」，品嘗大師級嘅家常菜，細說最Update嘅美學。

Ann由去年開始引入歷史悠久嘅「亞洲太平洋國際小姐選舉」到香港，今年為培訓入圍佳麗，誠邀崇基（左）同Dr. L（右）等專業導師，對佳麗進行全面訓練，代表香港參加呢個國際性選美活動。

為港出戰

講到選美比賽，香港人一般都會諗起「香港小姐」，但隨着全球一體化，我哋嘅眼光都要放眼國際，模特兒出身嘅Ann，喺呢方面就行快一步。「其實『亞洲太平洋國際小姐選舉』已經有五十年歷史，係一個國際性嘅選美比賽，我哋喺一八年先開始舉辦香港區嘅比賽，今年係第二年舉辦。

「呢個比賽，同香港人熟悉啲嘅『世界小姐』、『環球小姐』同『國際小姐』，統稱『選美Big Four』，四個選美活動，全世界超過五十個國家，每年都會派代表參加o架。」

Ann身兼主辦單位同形象總監，對參加者嘅要求自然高。「所以就有一系列嘅星級導師，喺唔同嘅範疇上訓練啲佳麗，令佢哋喺嚟緊八月舉行嘅決賽上，有最好嘅表現。而我覺得除咗選出香港區代表，最重要係令佢哋喺訓練嘅過程入面，由內而外都成為獨立自主嘅新女性。

「美唔係局限喺外表，內涵反而係最重要，我見過一啲好靚嘅女仔，但係佢哋食嘢食到o雪o雪聲，咁所有好印象都化為烏有啦！」

我帶三位嘉賓，去到位於九龍城嘅隱世小店「家．正料」，品嘗大師級嘅家常菜，暢談新派審美角度。

除咗三位嘉賓，大會嘅星級導師仲有前港姐亞軍陸詩韻（右），及名嘴黃桂林等，360。訓練入圍佳麗。

冰鎮柚子鮑魚杯（$68），以柚子汁扣九孔鮮鮑魚三小時入味，冰鎮後加上各種生果及柚子配食，十分開胃。

秘製花膠刺豚皮湯（$180/位），刺䐁皮即河豚皮「近親」，經水浸、去沙等繁複過程，再經人手拔刺三小時才可使用。加上老雞、金華火腿、龍骨及海味，文火熬制四小時，有化痰止咳等功效。

花雕鵝肝配脆餅（$288/6件），以五年花雕慢煮，西菜中做，入口即溶。

內外兼修

一講到同儀態相關嘅事，咁就要問吓禮儀師Dr. L嘞！「食嘢食到o雪o雪聲呢啲係習慣，其實要執就好簡單啫。我覺得o依家嘅儀態，唔止係Table manner、點用唔同嘅餐具咁單一化，而係在於喺唔同場合，衣着、舉止都要配合得宜，好似今日同Paco食飯，最合適嘅表現，就係o依家咁casual，攞到一個平衡點係好重要。」

除咗係星級導師，崇基仲兼大會音樂總監，喺審美上佢都有自己嘅一套。「喺睇靚女方面，我都好有經驗嘅！哈哈！講笑啫！我見到一班參賽佳麗，當中有啲會喺Facebook同IG玩直播，好似KOL咁，喺o依家社交網絡平台咁受歡迎嘅時候，我好欣賞佢哋有埋呢個talent。要知道開live要轉數快，喺談吐同表達上，都要更加收放自如，呢方面係同以前嘅選美好唔同。」

由名模到形象總監，Ann將自身經驗跟佳麗分享，指引新生代，令佢哋唔使兜錯路。　

對於保持至fit身形，Ann表示食咗幾多，就要還番幾多，所以自言為食嘅佢，喺運動方面相當勤奮。

崇基對Ann嘅「有入有出」理論，大表贊同，除咗滑水以外，佢仲有做Gym、打泰拳等，保持身形。

玻璃酥炸桶蠔（$138），以馬蹄配上美國筒蠔酥炸，外脆內爽。

香草牛油焗方脷魚（$288），方脷魚以新鮮雜香草及岩鹽調味，原條炸至酥脆，食用時淋上配汁，更加鮮味。

「收支」平衡

內涵以外，選美到頭來都要先吸引眼球，喺keep fit上，Ann就話：「我唔贊成過度節食，因為我都係一個好為食嘅人，所以我會好勤力做運動，食咗幾多就做番運動去還。雖然我個樣唔似，但我係好鍾意煮嘢食嘅，我跟媽咪學咗啲家常小菜，得閒就會煮。」

原來崇基都係隱藏廚神，「我係上海人，都幾鍾意食自己嘅家鄉菜，不過以前喺加拿大讀書，就好難搵到啱口味嘅，於是我就自己煮，我最鍾意食獅子頭，所以呢個煮得最叻。」

Dr. L就表示：「我之前都有做吓運動，不過後來打Golf整到條腰就好少做嘞。因為工作忙，所以我唔係好煮嘢食，等佢哋煮俾我食啦！哈哈！」

兼任大會音樂總監嘅崇基，大讚佳麗們有豐富嘅音樂感；Dr. L就坦言，要令一眾佳麗喺唔同嘅場合，都令人有儀態萬千嘅感覺。

作為國際商務禮儀培訓師，除咗成年學生，Dr. L喺國內都有開班授課，以小朋友為對象。

豆乳千層浸菜苗（$128），以多層腐皮壓成千層，以豆漿加上新鮮魚湯熬製兩小時，千層皮吸收湯汁，滋味無窮。

京蔥吊燒雞（$288），炸香嘅京蔥配上吊了六小時風乾後嘅炸雞，香脆肉嫩。

桂花金絲骨（$138），新鮮豬肋骨燒焗並以桂花入味，加上桂花蜜拉絲，色香味俱全。

家．正料
地址：九龍城福佬村道95號地舖
電話：28120698