楊秀惠捱飯盒做咕喱

自從《大帥哥》播畢後，東姑都好耐冇見過風騷入骨、嬌聲嗲氣嘅「艾妞嫂」楊秀惠，喺螢光幕出現嘞。其實，楊秀惠近年都忙於佢嘅美容事業，除咗要打理香港嘅店舖外，仲要擴張海外分店同內地市場，生意愈做愈大，要度個期出嚟拍劇相信都唔係咁易！

不過，東姑就真真真好彩，日前去灣仔美容展「血拼」時，就撞見佢喺自家品牌嘅攤檔做生意。當日，扮得靚靚嘅佢，親自上陣招呼客人兼狂sell產品。現場所見，佢凡事都親力親為，更加做埋阿四周圍執貨搬貨，搞到連食個飯盒都要分幾轉，呢個老闆娘認真厲害！

楊秀惠冇時停，東姑都唔敢打擾，企咗喺佢攤位成半小時，見佢有小小透氣位，先上前打個招呼。問到佢幾時出嚟拍劇？佢就話：「因為o依家想做好啲美容生意，所以會集中少少火力喺呢方面，希望啲生意好啲、上咗軌道，我就可以拍多啲劇。（你好親力親為，仲搬搬抬抬？）小生意嘛，我同埋啲同事都好努力做好件事，希望個品牌多啲人認識。」有你做生招牌，加上熱情嘅招待，放心，生意一定好o架！

楊秀惠為咗盤生意做到廢寢忘餐，一個飯盒分咗幾次食，錢真係唔易賺。

雖然楊秀惠貴為老闆娘，但佢就事事親力親為，落手落腳跟到足，絕對係員工嘅好榜樣。

據東姑現場目測，楊秀惠嘅美容產品銷情唔錯，客人絡繹不絕，做到冇停手。

楊秀惠落場sell客之外，更做埋生招牌任影唔嬲，非常nice！