黃智雯唔夠C君襟撈

上集《降魔的》大受歡迎，再拍續集《降魔的2.0》，女主角黃智雯（Mandy）依然做番急症室醫生；不過，今次唔同嘅係，佢身邊會有一隻精靈（C君，鄭詩君飾演）一直會跟住佢、保護佢。

連日來，Mandy為咗拍《降魔的2.0》就日以繼夜、夜以繼日，密鑼緊鼓咁開工。除咗男主角馬國明之外，戲份最多相信都係喺佢身上，難怪佢開親工都聚精會神，不苟言笑，仲經常閃埋一邊，靜靜培養情緒。早前，東姑就去到佢哋拍攝現場探班，發現Mandy未埋位前，個樣都幾cool cool哋，好彩拍完之後，都會緩和番啲壓力，仲識同大家笑吓啫！

不過，相對當日分別有對手戲嘅C君同謝雪心（心姐），Mandy就唔及佢哋咁「襟撈」喇！C君喺現場十足開心果，同工作人員談笑風生唔在講，離開時仲用自己架私伙車，載埋幾個幕後同事搭順風車，相當好人事。至於，心姐當日心情風騷，收工前交低啲道具佛珠、佛鏈，仲同人唔該前、唔該後先走，原來有廿四孝老公專程揸車嚟接佢收工，認真sweet爆！

而Mandy拍完就即嗱嗱聲吩咐助手執拾埋啲手尾，雞咁腳走。佢可能真係戲份重，趕戲攰得滯，而忽略咗人情世故喇！

《降》劇入面，Mandy 做番上集一樣嘅急症醫生，不過就有C君飾演嘅精靈傍喺身邊。

對拍攝頗為緊張嘅Mandy，畀盞大光燈照到滿頭汗，惟有不時攞紙巾印汗兼抹去面油，免得上鏡唔靚。

未到埋位時，佢會走埋一邊，冇乜同人吹水傾偈，靜靜咁培養情緒。

對手C君嘅態度完全截然不同，成顆開心果咁巡場，經常笑面迎人。

臨收工前，心姐除低啲佛珠、佛鏈交還畀道具手足，仲唔該前、唔該後，同大家揮手道別，禮貌有加。

心姐同丈夫陳啟亨老夫老妻，恩愛仲出晒名，當日丈夫又做「柴可夫」接收工。

好人事嘅C君，唔介意等埋幾個幕後同事，坐佢車價四十五萬嘅平治，一齊離開。

呢排密鑼緊鼓為《降》劇開工嘅Mandy，一臉倦容，難怪收工即雞咁腳，趕返去休息。