為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2019 年 05 月 23 日

《逃犯條例》一錘定音直上大會 主席大考驗

《逃犯條例》修訂陷困局,開四次會都未選出主席外,更鬧出史無前例嘅「雙胞胎」法案委員會亂局,令議程失晒控。據了解,政府渴望盡快通過修訂條例,立法會亦想解開目前困局,有人提議非常時期做非常事。打頭陣出招嘅,係保安局局長李家超,本周一佢就一錘定音,宣布六月十二日恢復《逃犯條例》修訂二讀,並會將草案直提上大會審議。快車突然「踩行油」,有傳係政府想趕在七月一日前通過,減少泛民利用《逃犯條例》煽動市民上街嘅影響力。

直上大會嘅做法,係有唔少弊處。前內會主席劉健儀話,《逃犯條例》嘅修訂例極具爭議,直上全體委員會審議係「好唔理想」,「一定唔及召開法案委員會,可以將條文仔細咀嚼咁好;加上大會不設公聽會呢一環,亦令立法會少咗個機會聽市民意見。」不過,亦有議員認為,這是能解決目前困局的最佳方法,「泛民趁亂局撈政治本錢,連議員本身職責都不顧。」

其實泛民聞到血腥味,早將呢仗變成選舉臨近前嘅拉票騷,收手停止玩嘢機會係零。政府對困局睇唔到出路,惟有來個快刀斬亂麻。如今直上大會已無懸念,下個考驗對象,就係立法會主席梁君彥。

有泛民議員打晒開口牌話,會喺大會上繼續上演暴力式搗亂,更不惜用盡無限發言嘅空間,每人問幾十條問題大玩拉布,務求東拉西扯,拖到暑期會期完結。換言之,逃犯條例嘅角力戰場,會由泛民與建制之爭,變成泛民同梁君彥嘅正面交鋒。

呢場硬仗要速戰速決,建制派已部署緊三招反擊,包括要求主席加強保安措施,鐵腕驅趕有心搗亂議會秩序嘅議員;其次係對於「揼波鐘」嘅拉布發言,要行使權力限制及限制議員發言,必要時甚至狠心剪布;仲有,必要時要求全體喺暑假期間加班開會,「政府亦有心理準備,暑假或有機會加會。」

呢三招制衡泛民玩嘢嘅力度唔細,不過可以肯定嘅係,梁主席一旦「硬起來」宣戰,射向佢嘅箭頭亦會從四方八面飛至,外面嘅輿論亦會嘈到拆天,自經歷過DQ風波一役走過來嘅佢,今次都要用盡十成做主席嘅功力至得嘞。

法案委員會鬧出雙胞胎後,泛民同建制派鬥到咬牙切齒,日前在會議室內大家都面左左,建制派更集體「擰歪面」,杯葛泛民的法案委員會。

 

草案一旦直上大會將是終極一戰,主席梁君彥要面臨大考驗。

 

李家超表示,恢復二讀辯論是「迫不得已的,艱難的決定」。