為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2019 年 05 月 19 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

夢幻式尋常

舞台劇百花齊放,有唔少影帝影后級人馬都踏上舞台,同戲迷近距離接觸,最近「風車草劇團」將美國神劇《尋常心》(Normal Heart)帶到香港,仲吸引到三屆金像影帝黃秋生,及演技突飛猛進嘅徐天佑演出,加上劇團核心人物梁祖堯、湯駿業(阿Dee)同邵美君,組成夢幻組合。

今次「Paco巨星飯堂」,我就邀得呢個夢幻組合,去到位於鰂魚涌嘅「麵鮮醬油房周月」,品嘗米芝蓮星級嘅拉麵,細說夢幻中嘅「尋常」。

阿Dee(右一)、阿祖(右二)及阿君(左二)同為演藝學院畢業生,佢哋話今次舞台劇《尋常心》邀得「大師兄」秋生(左一)演出,加上近年演技更見精進嘅天佑(中),組成「夢幻班底」,未演出已興奮。

 

有請大師兄

夢幻組合演出嘅神劇,由著名編劇Larry Kramer於八十年代撰寫,講述當時社會對愛滋病未有真正認識、對同性戀者仲未持開放態度接納之時,同志所承受嘅重大壓力。原著舞台劇近年重演,仲喺一一年獲得美國劇場界最高榮譽「東尼獎」嘅最佳重演劇作,神劇得以港化,全因阿祖、阿Dee同阿君。

兼任監製嘅阿Dee話:「《尋常心》係一個很好演嘅劇目,因為背景複雜,每個角色都令演員過足戲癮。對於觀眾而言,o依家嘅生活環境,比八、九十年代需要更大勇氣、決心去面對呢個劇本嘅主題。」

阿祖就表示:「當我哋決定要演呢個劇,就想搵啲重量級嘅卡士,於是我膽粗粗搵大師兄(秋生為演藝學院第一屆畢業生),我晚上十點打俾佢,話有個劇想搵佢一齊演,連劇本同收幾錢都未傾,佢十點三就應承演出嘞!」

秋生一臉悠然,從容應對:「我不嬲都欣賞『風車草』嘅,可以同佢哋一齊玩,我梗係應承啦!」

貴為影帝,秋生演戲自然手到拿來,阿祖話:「唔好睇大師兄好似好淡然咁,我哋圍讀嗰陣,先發現佢已經背晒啲對白,所有位都記住晒!呢啲我哋仲要繼續向佢學習!」

我帶五位貴賓,去到位於鰂魚涌嘅「麵鮮醬油房周月」,品嘗米芝蓮星級嘅拉麵,細說佢哋嘅「尋常心」。

 

阿祖表示其母睇過舞台劇嘅海報後,話佢同秋生有啲似樣,大家點睇?

 

上周記者會上,五位演員sharp醒現身,為新作造勢。

 

炸日本豆腐($30),外脆內軟,最啱佐酒。

 

日本和牛配蘿蔔($108),屬特色關東煮,蘿蔔清甜。

 

海老油.麵 ($91),屬鰂魚涌店限定菜式。以日本蝦乾製作,配上魚介粉及秘製醬汁調配成海老油,拌勻麵條後,入口甘香。

 

趕上雞精班

天佑今次飾演阿祖嘅舊情人,再次飾演同志角色,佢話:「今次同上次電影唔同,除咗演出方式唔同,今次嚴肅好多,而且電影可以NG,舞台劇就唔可以,加上四位對手都係紅褲子出身,我覺得我唔可以拖累佢哋。

「所以我特別搵咗老師,去同我預先排練,每一個細節都同我執,我希望可以追得上佢哋嘅步伐。」

夢幻組合嘅唯一女將阿君,跟阿Dee、阿祖創立劇團,三人同為演藝學院校友,並肩作戰多年,已建立一定默契。「我同佢哋喺《綠野仙蹤》開始合作,演過好多唔同嘅劇目,今次係我哋之前未試過嘅劇種,又請到大師兄同我哋演,我諗到七月正式排練嘅時候,會有更多嘅火花。」

繼賀歲片《恭喜八婆》後,天佑再度飾演同性戀者,跟阿Dee飾演嘅「不能出櫃銀行家」,及阿君飾演嘅女醫生,於舞台上鬥戲。

 

原著劇本除作舞台劇公演外,HBO亦曾將之改編成電視電影,今次首次翻譯成廣東話演出,確實令人期待。

 

十六年前一同創立「風車草劇團」,阿君、阿Dee同阿祖為劇團靈魂人物,三人合作多年,成團契機就係音樂劇《綠野仙蹤》。

 

雖然天佑(右二)同阿Dee(中)、阿祖(左二)早於一六年嘅舞台劇《夏風夜涼》合作過,但因為今次嘅劇種有所不同,令前者不敢怠慢,上堂令演技加速升呢。

 

周月拉麵($91),湯底為熬製六小時以上嘅清雞湯,配上梶田商店製醬油而成,具淡淡醬油香;加上易吸收湯汁嘅幼直拉麵,令人回味無窮。

 

周月沾麵 300g ($91、100/200/300g同價),沾汁以特製醬油、米酢、帆立貝酒等調配,味道層次豐富。

 

正煮即食麵

呢個組合,除咗演戲夠夢幻,連講食經都係dream cast,阿祖係有牌廚神,而秋生就係煮即食麵嘅專家。「我煮嘅方法,淨係啱煮日本嗰隻品牌o架啫!要齊水落麵餅,水量啱啱蓋過麵餅就Ok。開火後,啲水一滾,白泡一收,就收火食得!湯包千祈唔好落落去滾,要上碗之後先落o架。

「我咁煮係我姨丈教我嘅,以前佢喺日本做嘢,當年香港仲未有呢個牌子嘅即食麵,所以佢每次返嚟,都買幾大箱拎返嚟,就係嗰陣教我呢個正確嘅煮麵方法,佢話啲日本人就係咁煮。」

繼《極地情聖》後,秋生再與師弟阿祖合作,今次二人飾演兩兄弟,繼續產生化學作用。

 

憑《淪落人》橫掃多個影帝殊榮,但秋生喺演技上不斷挑戰自我,今次再踏舞台,必然又予戲迷驚喜。

 

阿祖演技精湛,廚藝一樣了得,考得兩個法國廚師牌嘅佢,不時為好友下廚。

 

香辣脆筍($26),爽口惹味。

 

香辣沾麵 300g ($91、100/200/300g同價)以秘製辣油製作沾汁,香辣兼備。

 

麵鮮醬油房周月
地址:鰂魚涌海光街30號地舖
電話:23367888